Fourth Sunday in Ordinary Time (C)

ONONAN BABASAEN Jer. 1:4-5, 17-19

Babasaen ya inaon ed libro na propita Jeremias
Inkuan na Katawan ed siak, “Kasakbayan ta kan initday bilay pinili ta ka la, tan kasakbayay inkianak mo, pinili ta kan magmaliw a propita ed saray bansa.”

Mamparaan ka, Jeremias; laka, ta ibagam ed sikaray amin ya ingganggan kod sikan salitaen mo. Ag ka la natan ontatakot ed sikara; ta no andi, pagmaliwen ta kan lalon ontakot no wadman ka lad sikara. Dengel ka, Jeremias! Onsumpad sika so balang sakey a too ed sayan dalin – saray arari ed Juda, saray opisyal, saray papari, tan saray totoo. Balet natan iitdan ta kay biskeg, pian nasumlang mo ra; magmaliw kan singa siudad ya aliber na padir, singa balatyang a lusek, tan singa gansan padir. Ag da ka natalo, ta wala ak ed sika a mangyagel ed sika. Siak, say Katawan, so nansalita.”

Salita na Katawan.

Ebat a Salmo
E. IKANTAK SO PANANGILABAN MO.

1. Katawan, sika so salimbengan ko; ag mo ak pan balut patatalo! Lapud matonung ka, tulongan tan iyagel mo ak pa. Dengel mo ak tan ilaban mo ak pa! E.

2. Sika pa so baton-dampay a salimbengan ko, tan mabiskeg a tirinsira a mangyagel ed siak, sikay salimbeng tan manangyagel ko. O Dios ko, iyagel moak pad saray totoon maoges. E.

3. Katawan a Dios, sikay paniilaloan ko; nanlapud impanbalolakik, sikay panmamatalkan ko. Sikay panmamatalkan ko legay bilay ko; iyaagel mo ak manlapu lad inkianak ko. E.

4. Ibawag koy inkatonung mo; tongtongen ko lawas so panangilaban mo. Nanlapud impanogaw ko ibabangat mo ak la, tan totongtongen ko ni ray makapakelkelaw a ginagawam. E.

KUMADWAN BABASAEN 1 Cor. 12:31-13:13

Babasaen ya ianon ed ononan sulat nen Pablo ed saray taga Corinto
Pampilalekan yo sirin iray lalon manonan langkap. Balet iparontal kod sikayo niy sangkaabigan ed amin.

Anggaman a nayarian koy mansalita na nandoroman salita da ray totoo tan saray anghil, no anggapo balet so arok, singa ak labat matalangatang a kampana tan makmaknul a piangpiang. Anggaman a naitdan ak na pakayarin mampulong na salitay Dios; anggaman a walad siak so kakabatan tan pakatalus ed amin da ray niamut a katwaan; anggaman a walay mabiskeg a pananisiak pian nayarian kon paekalen iray palandey ed kawalaan da, no anggapo balet so arok, anggapoy kakanaan kon too. Anggaman ya iter kod saray mairap-bilay iray amin ya kayaryan ko, o ibagat koy laman kon papoolan, no anggapo balet so arok, anggapoy kaabigan a niter to yad siak.

Say aro maanos tan mapangasi; aliwan maimon, o mapasirayew, o mapaatagey; say aro aliwan mabanday so kagagawa to, aliwan masiblet, o maipapasnuk; ag mamopokuk na sakit na linawa. Say aro ag manliliket ed kaogsan, no ag ingen manliliket ed katwaan. Say aro et ag balut onsuko, tan ag balut naandian na pananisia, ilalo, tan anos.

Walay pakayarin mampolung na salitay Dios, et ag mansiansia. Wala ray langkap na panagsalitay nandoroman salita, et ag ira mansiansia. Wala met so kakabatan, et ag mansiansia. Balet say aro mansiansiad anggad angga. Aliwa nin nagnap so kakabatan tayo tan say pakayari tayon mampolung na salitay Dios. Balet no onsabi lay ayadyari, naekal lay aliwan ayadyari.

Nen ogaw ak ni inoogaw so panagsalitak, panagliknak, tan panagisip ko. Balet natan ta matakken ak la, nilingwanan ko la ray inoogaw a kagagawa. Say nanengneng tayo natan et singa burarog a lupa ed salming; balet onsabiy agew a nanengneng tayo ed lupa-lupaan. Daiset niy amtak natan, balet onsabi’y agew a magmaliw ya ayadyari so pakaamtak, a singa ayadyarin pakapikabat na Dios ed siak.

Mansiansia ra yan talo: say pananisia, ilalo, tan aro; balet say aro so sangkabalgan ed saraya.

Salita na Katawan.

Alleluia
E. Alleluia. Siak so silew na sankamundoan, kuay Katawan; say ontombuk ed siak niwalad sikatoy silew a mangiiter na bilya ya andi-anggaan. E. Alleluia.

Ibanghilyo Luc. 4:21-30

+Babasaen ya inaon ed masanton ibanghilyo onung ed kinen Lucas
Walad sinagoga si Jesus tan inkuanto, “Asumpal ed sayan agew so ibabaga to yan parti na Masanton Sulat a nadngel yo.”

Indayew na amin a totoo, tan mankelaw irad saray mararakep a salita to. “Aliwa tan sikato ya may anak nen Jose?” tepet da.

Kanyan inkuantod sikara, “Andi-saew ya ibaga yod siak imay oliran: ‘Doktor, tambal moy laman mon dili!’ Ikuanyo met ni, ‘Gawam met ed dilin baley mo ray abalitaan min ginagawam ed Capernaum!’” Insan intuloy to, “Kuankod sikayo: anggapoy propitan naawat ed dilin baley to. Balet kuankod sikayo ya amayamay so balon bibii ed Israel nen panaon nen Elias. Diad saman, taloy taon tan kapaldua ya ag inmoran a balut, kanyan walay balbaleg ya eras ed lapag na saman a dalin. Balet ag nibakiy Elias ed anggan siopad sikara. Nibaki inged sakey a balon bii ed Sarepta, sakey a baley ed Sidon. Ontan met amayamay iray akating ed Israel nen panaon nen propita Eliseo, balet anggapoy inmabig ed sikara. Si Naaman labat a taga Siria so inmabig.”

Mapalaloy pasnuk na amin da ra may totoon wadmad sinagoga nen nadngel da ya. Inmalagey ira, insan da impaway ed siudad. Inyakar dad toktok na nipalandey a pasen ya angipaalageyan na siudad da, insan da ipepelag. Balet linmabas ed pegley da, tan linma la.

Ibanghilyo na Katawan.