Kumaduamplo tan walo a Simba na Ordinarion Panaon (C)

ONONAN BABASAEN               2 Ar. 5:14-17

Babasaen ya inaon ed kumadwan libro na Saray Arari

Linma sirin ed Jordan si Naaman, linmegep ya amimpito, onung na imbaga nen Eliseo, et sigput ya inmabig.  Balibali so nagmaliway laman to tan singa baog na ogaw so baog to.  Kaiba ton amin iray totoo to nen pinmawil ed kinen Eliseo tan kuanto, "Amtak la natan ya anggapo lay arum a dios no ag say Dios na Israel, kanyan awat mo pa labat yay awit kon rigalod sika."

            Inmebat si Eliseo, "Diad ngaran na mabilay a Katawan a panlilingkuran ko, ag ak mangawat na antokaman a rigalo."

            Ipapasoot nen Naaman ya iter, balet ag to awaten.  Kanyan inkuanen Naaman, "No ag mo awaten yay rigalok, abuloyan mo pa sirin a mangisempet ak na dalin a kargaen na duaran mula, ta manlapu lad sayan agew ag ak mangisaklang o mamool na saray bagat ed dinanman a dios likud ed Katawan."

Salita na Katawan.

Ebat a Salmo

E. Say Katawan impaamta tod saray bansa so manangilaban a pakayari to.

1.  Kantaan yoy balon kanta so Katawan; nanggagaway makapakelkelaw iran bengatla!  Lapud dilin pakayari tan masanton biskeg to, sikatoy analo. E.

2.  Imbawag na Katawan so impanalo to; impaamta tod saray bansa so manangilaban a pakayari to.  Sinumpal toy insipan tod saray totood Israel, a katekep toy ag mangoman a panangaro tan say inkatoor tod sikara. E.

3.  Anengneng na amin a katoowan so impanalo na Dios tayo.  Mankanta kayod liket ed Katawan, amin yon walad mundo; idayew yo diad panamegley na saray kanta tan saray maliket ya eyag!  E.

KUMADWAN BABASAEN          2 Tim. 2:8:13

Babasaen ya inaon ed kumadwan sulat nen Pablo ed kinen Timoteo

Nunot moy Jesu-Cristo a pinaolid bilay tan nanlapud boleg nen David, onung na ibabagay Maung a Bailtan ipupulong ko.  Lapud pangipupulong kod sayan Maung a balita, maniirap ak tan natan agolunggolungan ak a singa kriminal.  Balet ag agolunggolungan so salitay Dios.  Lapud saya itetepel koy amin a bengatla, makasengeg ed saray pinilin totooy Dios, pian nagamuran da met komun so kilalaban a walad Cristo Jesus tan say andi-anggaan a kagalangan.  Niay sakey a tuan salita: "No kaiba tayo ya inatey, kaiba tayo met a mambilay.  No ituloy tayoy mantepel, nakaiba ti met a manoley.  No sikato so ibori tayo, sikatayo met so ibori to.  No aliwa tayon matoor, sikato nin siansia so matoor, ta ag to nibori so sikaton dili."

Salita na Katawan.

Alleluia

E. Alleluia. Lokasan mo pay kapusoan mi, O Katawan, pian narengel mi ray salita na Anak mo.  E. Alleluia.

Ibanghilyo                              Luc. 17:11-19

Babasaen ya inaon ed masanton ibanghilyo onung ed kinen Lucas

Diad panaakar nen Jesus a mamaarap ed Jerusalem, linmabas ed ketegay Samaria tan Galilea.  Nen onloloob ed sakey a bario, inabet na samploran totoo ya akating.  Nanalagey irad arawdawi tan iningal da, "Jesus! Katawan! Kasian mo kami!"

            Nen anengneng nen Jesus ira inkuanto, "Laka yon mampanengneng ed saray papari."

            Leleg dan oonla, inmabig ira.  Sakey ed sikara so pinmawil nen anengneng ton inmabig, tan indaydayew toy Dios.  Dinmakmomo ya anggad dalin, diad saliyan nen Jesus, tan akisalamat ed sikato.  Samaritano yan too.  "Aliwa tan samploray inmabig?" tepet nen Jesus.  "Kawalaan da ray siamira? Akin et sayan sangkaili labat so pinmawil a misalamat ed Dios?" Inkuanen Jesus ed sikato, "Alagey ka, tan sempet ka la.  Say pananisiam so amaabig ed sika."

Ibanghilyo na Katawan.