ONONAN BABASAEN Kab. nen S. 2:12, 17-20
Babasaen ya inaon ed libro na Kakabatan nen Solomon
Kuan na saray totoon maoges, "Makaskasbel labat iray totoon matonung, kanyan mananap itayoy pankanawnawan mamatey ed sikara. Sumpa rad gagawaen tayo; aakusaen da itayon onsusumlang ed Ganggan nen Moises tan onsusumpad saray kaogaliyan da ray lalaki tayo.
"Balet nengnengen pa no nagawa no oras na ipatey da! No tuan anak na Dios iray matonung, iyagel ira na Dios ed saray kalaban da. Kanyan suboken tayo ra. Magmaliw tayon maruksad sikara, tan pairapen tayo ra; nengnengen pa no panoy kareen da tan inkadugay panagnunot da! Naamtaan tayo so anggaan na inkaanos da! Sintinsiaan tayo ra na makapabaing ya ipapatey. Andi bali, ta kuandan iyagel ira na Dios."
Salita na Katawan.
EBAT A SALMO
E. Say Katawan iyaagel toy bilay ko.
1.) Lapud pakayarim, O Dios, ilaban mo ak pa; lapud biskeg mo, iliktar mo ak pa! Dengel mo pay pikakasik, O Dios; talineng mo pa ray salitak! E.
2.) Nitan la ray malastug a totoon ondogpad siak; labay ak a pateyen na saray maruksan totoo -- totoon ag da ikabkabilangay Dios. E.
3.) Balet say Dios so mananulong ko. Say Katawan so manangyagel ko. Katawan, sililiket ak a mangibagat ed sika; pisalamatan ta ka lapud kamaungan mo. E.
KUMADWAN BABASAEN San. 3:16-4:3
Babasaen ya inaon ed sulat nen Santiago
No iner so kawalaay imon tan pantatalonaan, diman met so kawalaay golo tan amin a klasin kaogsan. Balet say kakabatan a nanlapud Dios et ononaona, malinis. Maaro met ed kareenan, maoyamo, makaaro, mapangasi, makolid panaggaway kaabigan, anggapoy labien to, tan aliwan mansimpisimpitan. Say toon maarod kareenan, diad panaanap toy kareenan, isisibwag toy bokel a mambungay katonungan.
Antoy panlalapway panlalaban tan pankokolkol yo? Ag kasi saray pilalek yon maoges a mansusumpaan ed balang sakey ed sikayo? Wala ray labalabay yo balet et ag yo ra nagamuran, kanyan mamatey ki la; wala ray pampilpilalekan yon nagamuran balet et ag yo ra naala, kanyan mikolkol tan milaban ki la. Ag yo nagagamuran iray labay yo, ta ag yo ra kekekewen ed Dios. Tan no mikerew kayo bilang ag yo naawat, ta maoges iray getma yo; say bengatlan panliketan yon dili so kekerewen yo.
Salita na Katawan.
Alleluia
E. Alleluia. Maliket ka, Ama, Katawan na tawen tan dalin; impaamtam ed saray totoon mapaabeba iray mistirio na panarian. E. Alleluia.
IBANGHILYO Mar. 9:30-37
Babasaen ya inaon ed masanton ibanghilyo onung ed kinen Marcos
Si Jesus tan saray disipulo to tinaynan da man a pasen tan dinmalan irad Galilea. Ag labay nen Jesus a nakabatan na totoo no iner so kawalaan to, lapud ibabangat tod saray disipulo to, "Niawat so Anak na Too ed lima da ray totoon mamatey ed sikato, balet onolid bilay kayariy taloy agew."
Ag atalusan ya na saray disipulo to, balet antakot dan osisaen ed sikato.
Linma rad Capernaum. Nen wala rad loob na abung tinepet nen Jesus ed saray disipulo to, "Anto may pansasangsangan yod dalan?"
Ag ira inmesel, lapud say pansasang-sangan da et no siopay manona ed sikara. Inmirung si Jesus tan tinawag to ray labinduan disipulo, insan kuantod sikara. "Siopamay labay to so walad onaan, mampaonur tan manlingkur ed amin." Tinawag toy sakey ya ogaw tan pinaalagey tod pegley da. Inampupo to tan kuantod saray labinduan disipulo, "Siopamay mangawat ed sakey a singa sayan ogaw lapud siak awaten to ak; tan siopamay mangawat ed siak, aliwan siak labat lay awaten to, no ag ingen pati say angibakid siak."
Ibanghilyo na Katawan.
7 comments:
Dyad samay unaan ya abasa ed libro na Kakabatan say kuanto, “No tuan anak na Dios iray matonung, iyagel ira na Dios ed saray kalaban da. Si Jesus in fulfill to man ya prophecy tan natan ed sayan ebanghelyo ibaga lamet nen Jesus ya arapen toy kairapan to balet God will take care of him. Tan twa say dios ingen walad sikato. No maminsan amayamay so siblangan tan pankukulkulan tayo singa saramay disipulos to pankukulkulan da no siopay unsublay ya manmaliw ya lider da, antola kasi nagawad sikara?
Natan si jesus angalay ugaw nilakap to ed pegley na saray disipulos to ya singa ibabaga ton bantayan takayo ya singa sayay panlalakap kod sayay ugaw… agyo nununuten tay no siopay sangkaatageyan… agakayo natatakot no antoy arapen yo ta unya no panoy panangarok ed sikayo. Anggad natan agtayo komun lilingwanan ya ibabaga nen Jesus ya naynay ed balang sakey ed sikatayo, “Niay bilay ko ya mansimpit tan man alaga ed sika.” Idayew tan mampasalamat tayod Dios ed sarayan gagawaen to ed sikatayo.
macmac
Gospel Reading:
Makapalek so ingkagawa ta kasumsumpal ton impaamta nen Jesus ed saray disipulo to ya pairapen da tan pateyen da balet say pantotongtungan na saray disipulo no siopay makaona ya makalay posisyon nen Jesus ya manoley. "Nunot Bilay" ya kuanda iray disipulo!
Sikatayo ran Kristiyano "nunot bilay" singa met iray disipulo.
kasumsumpal ya bagyo, amayamay ya naandian abong, saray lumalako inamoten dan itagey so bili na yero, tabla, balakyang, pasak etc...
Amayamay so apultot ya linyay koryente, anggapoy silew ed kaabongan, saray lumalako intagey so presyo ya generator. saray walay generator, nanaanapan da met.
No wala ray ponsia, saray naimbitan ag ni ra kontento ya akapangan, ombogno ni ra ya mamimpiga-piga, wala ni balon dan sulpot so anaknalasi. ag ni ra kontento ya natabaay sungot da, say labay da amay mantedtedter so taba ed sungot da.
No wala ray kakanayon ya balikbayan onla itayo ya mikerew na abet. itdan da itayoy kawes, chocolate, sabon o antokaman. ag ti ni akisalamat, makokomplen tayo la. Sabon labat! twalya labat! say labay tayo aruman da ni.
"nunot bilay!"
Say tuwan Kristiyano balet, ag to nunotey bilay to. Say nunoten to say bilay ya arum ya too.
Sikato ya so rason no akin et pinairap tan pinatey day Jesus. Ag to ninunot so bilay to. Say ninunot to say bilay ya arum ya totoo.
karaklan met ed saray pansasangsangan tan kulkolan na totoo et saray bengatlan anggapoy kakanaan. wala ray naniinoman ya say nansasangsangan da et no pigara so sweldo nen wowowie. ngalngali la ra mansasaksakan. pigara lay inatey ed videoke lapud kansion ya "my way", natan wala lay balo kuno "nobody, nobody", ag patalo ed pangansion, odino siopa so mas maganan darna, si angel o si marian. saray disipulo met nansasangsangan day bengatlan anggapoy kakanaan, "siopa ed "sikara so manona ed panarian?". imbangat ira nen hesus no siopa so manona. aliwan no siopa so walad pwesto, aliwan no siopa so akaona ed linya, aliwan no bibirberen ya pangulo no agta no siopa so manpaabeban manserbe ed kapara ton too. j. tesoro
sakey nen pansasangsangan na totoo natan: Siopa kuno so mas maung ya ontekyab ya darna: si angel o marian??? jejejejeje.
sayan simba saray babasaen tayo tawagen day imano tayo ed say ulupan tayon mananisia. no maminsan wala iray sangsangan tan kulkulan tayo. say panlalapuan to ya no maminsan et say paniimonan tayo ed sakey tan sakey, kuanen santiago ed kumaduan babasaen. no maminsan met et manlalapud saray totoon mamapaueges ed saray totoon maung so gagawen da, ya kuanen makabat ya nansulat ed immonan abasa.
ilaloan tayo sirin ya diad itutumbok tayo ed Katawan walan walay pagsubok - ya manlapud saray dilin kakaiba tayo o dino manlapud saray kalaban tayo.
antoy ebat tayo ed satan? say kuay Katawan ed evangelio nepeg tayo ya magmaliw ya mapaebeba tan singa ogogao ya ag mansinti o dino ag ombawi o mannunot na maoges ed kapara tayo.
mairap . . . balet nayarian tayo ta impanengneng la na Katawan tayo.
bp rene
The first reading tells us how the devil works into the minds and hearts of people who are witnessing goodness of others and their closeness to God. Their only intention is to STOP everything not because what they see is bad but because they see their opposite. Is it not wanting goodness itself or just plain sounding board for them. Goodness can become a mirror to others. From these situation, misunderstanding and judgment is inevitable.
These are the causes of the death of our good Messiah.
envy and jealousy, imon tan inggit: saraya so rason met ya nanengneng tayo ed samay pansasangsangan daray apostoles na Katawan.
saraya met so umpisa na amin a kolkolan tayo ran totoo, diad panagbilay na san-asawa, sana-agi, diad trabaho tan anggad pansisirbi tayo met ed simbaan.
Post a Comment