Baptism of the Lord

ONONAN BABASAEN Isa. 42:1-4,6-7

Babasaen ya inaon ed libro na propita Isaias

Say Katawan kuanto, “Saya so aripen ko a pinabiskeg ko—sikatoy pinilik tan pakaliliketan ko. Pinanok na ispirituk, tan sikatoy mangyakar ed balang bansa na inkatonung. Ag to oneyag odino mangyatagey na bosis to; ag mambando ed saray dalan. Ag to poteren so pikewet a tanobung odino erepen so makuykuyep a lamparaan. Iyakar toy mansiansian inkatonung ed amin a katoowan. Ag naekalan na ilalo odino biskeg na linawa; iletneg tod mundo so inkatonung. Pampilalekan ya aalagaren na saray ararawin bansa so bangat to.”

“Siak, say Katawan, tinawag ta ka tan initdan ta kay pakayari a mangipakurang na inkatonung ed tapew na dalin. Diad panamegley mo misipanan ak ed amin da ray katoowan; diad panamegley mo mangyakar ak na silew ed saray bansa. Itdan moy pakanengneng iray bulag, tan ibolus mo ray akayorung ed ambilonget a prisowan.”

Salita na Katawan.

Ebat a Salmo

E. SAY KATAWAN IBINDISION TOD SARAY TOTOO TO SO KAREENAN.

1. Idayew yoy Katawan, sikayo ran anghil na Dios; idayew yoy kagalangan tan say pakayari to. Idayew yoy mapagalang a ngaray Katawan, no ompanengneng imay Masanto, dakmomo kayod arap to. E.

2. Narerengel so bosis na Katawan diad tapew da ray dayat; narerengel so bosis to ed saray danum. Narerengel so bosis na Katawan, say bosis ton makapanyari tan napnoy kagalangan. E.

3. Onkakarul so mapagalang a Dios, legan ya amin a totood Timplo to et oneeyag, “Nagalang so Dios!” Ooleyan na Katawan iray danudanum; manari ya anggad angga. E.

KUMADWAN BABASAEN Gaw. 10:34-38

Babasaen ya inaon ed Saray Gawgawa

da ray Apostol

Nampaliwaway Pedro: “Natan ko la atebek ya anggapoy lalabien na Dios. Pakaliketay Dios so siopaman a walay takot ed sikato tan manggaway inkatonung, anggan antoy bansa to. Saray Israelita so angiteray Dios na salita to. Sikaray angiteran toy Maung a Balita, a mangiter na kareenan diad panamegley nen Jesu-Cristo, a sikatoy Katawan na amin a katoowan! Kabat yoy agawad intiron Judea, a ginmapod Galilea, kasumpal na binyag ya impupulong nen Juan. Amta yo no panoy impangiter na Dios ed kinen Jesus a taga Nazaret na Ispiritu Santo tan say pakayari. Nililiber ton amiy pasen, nanggagaway kamaungan tan nampapaabig ed saray papairapey dimonyo, ta say Dios walad sikato.”

Salita na Katawan.

Alleluia

E. Alleluia. Linmokas iray katawenan tan nadngel so bosis na Ama: Sikato yay inararok ya Anak—dengel kayod sikato. E. Alleluia.

Ibanghilyo Luc. 3:15-16, 21-22

Babasaen ya inaon ed masanton ibanghilyo onung ed kinen Lucas

Binmiskeg so ilalo ray amin a totoo tan tinetepet dad sikaran dili no si Juan et sikato la kasiy Cristo ya aalagden da. Kanyan inkuanen Juan ed sikaran amin, “Siak bibinyagan ta kayo ed danum, balet walay manomtombuk ed siak. Sikatoy makapanyari nen siak tan ag ak manepeg ya anggan mangokbar na sandalya to. Sikato binyagan to kayo ed Ispiritu Santo tan apoy.”

Kasumpal ya abinyagan ya amin iray totoon dinmadago, abinyagan met si Jesus. Nen mampipikasi si Jesus, alokasay tawen tan dinmapod sikatoy Ispiritu Santo ed nengneng na laman a singa malapati. Insan walay bosis a nanlapud tawen a nankuan, “Sika so dilin Anak ko ya inararok; pakaliliketan ta ka.”

Ibanghilyo na Katawan.