ONONAN BABASAEN Isa. 9:1-7
Babasaen ya inaon ed libro na propita Isaias
Aminsan naplag ed kababaingan so dalin na saray tribu di Zabulon tan Neftali; balet diad arapen a panaon nitanduro yan lugar, manlapud Mediteraneo a mampabokig ya anggad dalin ed nibaliw na Jordan, tan nasakop to ya anggad Galilea a panaayaman na saray sangaili. Akanengneng na baleg a silew iray totoon nankukurang ed kabilongetan. Nanayam irad sakey a dalin ya ambilbilonget, balet natan onsisindag so silew ed sikara. Initdan mo ray baleg a gayaga Katawan; impagmaliw mo ran maliket. Magayaga ra lapud saray ginagawam; singa saray totoon maliket no manaani ra, odino singa ra saray manaapag na asamsam dan kayamanan. Maliket ira lapud pinoter moy pakon sasakbaten da tan say bastun a mamepekpek na saray takeb da. Tinalom so bansa ya amairap ed saray totoom, a singa samay impanalom nen saman ed saray sondalo na Madian. Oputen na apoy iray buta na ondodogpan sondalo tan amin a kawes dan ataltalagsikan na dala.
Diad sikatayo nianak so sakey ya ogaw! Niiter ed sikatayo so sakey ya anak a laki! Sikatoy magmaliw a manoley tayo. Natawag a “Makapakelaw a Mananimbawa,” “Makapanyarin Dios,” “Andi-anggaan ya Ama,” “Prinsipi na Kareenan.” Onlaknab lan onlaknab so pakaoley ton ari, mansiansian mareen so panarian to. Manoley a kasalat nen Ari David, tan iletneg tod kaptekan tan katonungan so pakayari to, manlapud natan ya anggad angga. Andi-saew a sumpalen ya amin na Makapanyarin-amin a Katawan.
Salita na Katawan.
Ebat a Salmo
E. DIAD SAYAN AGEW NIANAK ED BALEY NEN DAVID SO MANANGILABAN, SAY CRISTON KATAWAN!
1. Kantaan yoy balon kanta so Katawan! Kantaan yoy Katawan, amin yon katoowan ed tapew na dalin! Kantaan yoy Katawan, tan idayew yo! E.
2. Ibawag yon inagew-agew so maung a balita ya inlaban to itayo. Ibando yod saray bansa so kagalangan to, tan diad amin a katoowan iray makapakelaw a gawgawa to. E.
3. Manliket kayo, sikayon dalin tan tawen! Ungol kan dayat tan amin a pinalsa a manaayam ed sika; manggayaga kayon kaalogan tan amin a pinalsan manaayam ed sikayo. E.
4. Onsabiy Katawan a manoley ed sankamundoan. Maptek tan matonung so panoley tod amin a katoowan. E.
KUMADWAN BABASAEN Ef. 1:3-6,15-18
Babasaen ya inaon ed sulat nen Pablo ed saray taga Efeso
Nagalang komuy Dios tan Ama na Katawan tayon Jesu-Cristo, ta initdan to itayo na amin a maispiritun bindision ed katawenan, lapud pikakasakey tid Cristo. Diad sayan pikakasakey tid Cristo, say Dios pinili to itayo la, kasakbayan ya apalsay mundo, pian magmaliw itayon masanto tan anggapoy pakabalawan ed arap to. Lapud panangaroy Dios, inggana to itayo lan magmaliw ya anak to diad panamegley nen Jesu-Cristo. Sikato yay linawa tan getmay Dios. Igalang tayo lapud makapakelaw a panangaro ton inter tod sikatayo diad panamegley na inararo ton Anak!
Kanyan nanlapud impakabalitak ed pananisia yod Katawan a Jesus tan say panangaro yod amin da ray totooy Dios, andi-tondan misasalamat ak ed Dios lapud sikayo. Nununoten ta kayo ed saray pikakasik, tan kekerewen kod mapagalang tan makapanyarin Ama a Dios na Katawan tin Jesu-Cristo, ya itdan to kayo komuy Ispiritu. Sikatoy mangiter ed sikayoy kakabatan, tan ipaamta tod sikayoy Dios, pian nakabatan yo. Ipipikasik a naliwawaan komuy kanunotan yo pian naamtaan yo no antoy ilalon impanawagan tod sikayo, no panoy kayaman na makapakelaw iran bindision ya insipan ton ipatawir ed saray totoo to.
Salita na Katawan.
Alleluia
E. Alleluia. Nen saman nansalitay Dios ed saray lalaki tayo diad panamegley da ray propita. Amimpiga-piga to yan ginagawa, tan diad nandoroman pamaakaran. Balet diad sarayan kaonuran ya agew, say Dios nansalitad sikatayo diad panamegley na Anak to. E. Alleluia.
Ibanghilyo Luc. 2:41-52
Babasaen ya inaon ed masanton ibanghilyo onung ed kinen Lucas
Tinaon-taon, kapag Pistay Paskua, oonlad Jerusalem iray atateng nen Jesus. Nen mantaon na labindua si Jesus, linma rad pista onung na kaogaliyan na saray totoo. Kasumpal na pista, linma la ran onsempet. Balet si Jesus tinmilak ed Jerusalem ya ag amtay atateng to. Abaloan dan kaiba to ray arum a totoon onsesempet met la, kanyan sanagew la ran manaakar, insan da inanap ed saray kakanayon tan kabkabat da. Nen ag da naalmo, pinmawil irad Jerusalem a mananap ed sikato. Kayariy taloy agew, nalmo rad dalem na Timplo. Akayorung ed pegley da ray mamaistro, onderengel ed sikara tan tetepetan to ra. Mankelaw iray amin ya akadngel ed sikato, lapud kakabatan tan saray ebat to. Mankelaw met iray atateng to nen anengneng da. Inkuanen ina to, "Anak, akin et onyay ginawam ed sikami? Mapalaloy pagpaga mi nen amam diad panaanap mid sika."
Inmebat ed sikara, "Akin et inanap yo ak sirin a? Ag yo ta amtan nakaukolan a wala ak ed abung na Amak?" Balet ag da atalusan yan imbaga tod sikara.
Kaiba ran pinmawil si Jesus ed Nazaret, tan matoluk ed saray atateng to. Inyatol nen ina to ra yan amin ed puso to. Binmaleg si Jesus, binmaleg met so kakabatan to, tan say panangaroy Dios tan saray totoo ed sikato.
Ibanghilyo na Katawan.
4 comments:
bali-balin prinsiyo ed biblia: "you know the tree by its fruit" (naamtaan moy tanaman (sengeg) diad panamegley na bunga.
No mangaliw kay mangga, say labay mo amay masamit tan magata.Panoy pakaamtam ya masamit so mangga ya nalam ya ag mo lolokasan? tepeten mo syempre ed managlako. Balet no maminsan anapseng no tawayan mo la. Insan mo ikuan: "makapoy so sengeg ya nanlapuan to ya. Niloko to ak may managlako".
Natan et fiesta na Sto. Nino. Sikato yay bunga nen Jose tan Maria. Ngal-ngali anggapoy nisulat ed biblia onung ed say impamabaleg da ed kinen Jesus. Balet sayan ogaw et atawag ya masanto aliwan lapur labat ta sikato et napnek na Ispiritu Santo tan sakey ya Anak na Diyos no ag ta ingen inako nen Jose tan Maria so kanepegan da ya pabalegen si Jesus ya masanto. Kanyan ag la makapakelaw a si Jesus et atawag ya masanto anggan nen ogaw ni. Maong ya sengeg si Jose tan Maria kanyan say bunga ra maung met. No amto may bunga, onya met so sengeg.
Amtoy klase ya bunga yo? anapseng kasi? makapadismaya? o masamit tan magata?
masanto met kasi iray anak yo? no andi, ompano sikayo ran atateng et aliwan masanto...
-jul
Diad sakey ya klase tinepet na maestra ed saray ogogaw: "Iner so kawalaan na San Fabian? ""Diad Luzon", so ebat.
"Iner so Luzon?" "Diad Pilipinas"
Iner so Pilipinas? Diad Asia.
Iner so Asia. Diad mundo.
Iner so mundo?
Anggapo so akasel. Intagey nen Maria so lima tan inkuan to: "Diad lima na Sto. Niño!"
Let us reflect on our response to the basic rights of children: 1. children deserve homes with a true family spirit. 2. the best gifts for children are fathers who truly love and honor their mothers. 3. children have a right to enjoy a wonderful world.
lapud samay palabas ya MAY BUKAS PA ya gaganapan na ogaw ya mangaray Santino dakel ed saray atateng so mangusto ya maka-anak met ira a singa si Santino. pero say baleg a tepet...antoy motibo da no akin et gabay day maka-anak a singa si Santino? lapud ta si Santino et cute tan mabait ya ogaw o lapud saray milagro ya nagagawa to? ya sarag dan tepeten no anto so umpaway ya nemuro ed jueteng odino diad lotto pian unyaman tan unsanting so panagbilay da.
diad sayan fiesta na Sto. Nino ipapanunot na Katawan tayo ya saray anak odino ogogaw aliwan inter na Diyos ed saray sanasawa pian usaren da ed saray makapoy ya iran getma. sikara ingen so nepeg ya asikasoen tan aroen a singa panangaro tan panangasikaso na Dios ya amalsad sikatayon amin.
Post a Comment