ONONAN BABASAEN Sir. 35:12-14, 16-18
Babasaen ya inaon ed libro na Sirac
Matonung so Katawan tan aliwan manangibiig. Ag to kakalabanen iray mairap-bilay; no mampikasi so sakey a toon nanggawaay makapoy, ondengel so Katawan. No mampikasi ray olila tan saray bibiin balo, ag to pepetay layag tod sikara.
Panlingkuran mon mabolbolus so Katawan, et awaten to ka; onsabid tawen iray pikakasim. Onlabas ed lorem so pikakasi na toon mapaabeba tan ontuloy ya anggad pakasabi tod Sankatageyan a Katawan; manayam diman imay pikakasi, anggad ebatan na Katawan diad pangimano ton nagawa so inkatonung tan nadusa iray nankasalanan.
Masiglat ya onggalaw so Katawan. Anggapoy anos tod saray totoon maoges. Ombawi diad panamegley na panemek tod saray paganon totoo. Sigput ton paandipaten iray totoon anggapoy panangasi tan mapaatagey, tan deralen toy pakaoley da ray totoon maoges.
Salita na Katawan.
Ebat a Salmo
E. Dedengelen na Katawan so akis da ray doruka.
1. Misalamat ak lawas ed Katawan; ag ak ontondan mangidayew ed sikato. Idayew koy Katawan lapud saray ginagawa to; ondengel tan manggayaga komun iray maniirap! E.
2. Say Katawan sumpad saray managgaway kaogsan, kanyan no ompatey ira, sigput la ran nalingwanan. Saray matonung ontatawag irad Katawan, et dedengelen to ra; iyaagel to rad amin a gunigon da. E.
3. Say Katawan maasinger ed saray nanaekalay biskeg na linawa; ilalaban to ray sigput a naandiay ilalo. Ilaban na Katawan iray totoo to; ag nadusa ray papaiyagel ed sikato. E.
KUMADWAN BABASAEN 2 Tim. 4:6-8, 16-18
Babasaen ya inaon ed kumadwan sulat nen Pablo ed kinen Timoteo
No say siak, ngalngali ak la nibagat; sinmabi lay oras na itaynan kod sayan bilay. Ginawak so anggaay nayarian kon akilumba tan binatik koy nepeg kon batiken. Nansiansia ak a matoor ed pananisia. Maganok lan nagamuray tumang na impanalo a niiter lapud matonung a panagbilay. Say Katawan a matonung a Huis so mangikoronad siak diad saman ya Agew, aliwan siak labat, no ag pati amin a mangaaro ed isabi to.
Anggapoy anggan sakey ya angibad siak nen inmonan inmarap ak ed korti. Tinaynan da ak ya amin. Ag ya komun ipakasalanan na Dios ed sikara! Balet inibaan tan pinabiskeg ak na Katawan, kanyan ayarian kon impulong a sigput so salita, pian narengel na saray amin a Hintil; tan nilaban ak ed sangiy lion. Say Katawan so mangyagel ed siak ed amin a kaogsan, tan sikato met so mangyakar ed siak diad mangatatawen a Panarian to. Nagalang komun ed ando lan ando! Amen.
Salita na Katawan.
Alleluia
E. Alleluia. Ispiritu tan bilay, Katawan, iray salitam; walad sika ray salitan mangiiter na bilay ya andi-anggaan. E. Alleluia.
Ibanghilyo Luc. 18:9-14
Babasaen ya inaon ed masanton ibanghilyo onung ed kinen Lucas
Sinalita met nen Jesus yan alimbawa ed saray totoon ipapasen dan matonung so sikaran dili tan mumurmuraen da ray arum: "Walay duaran totoo a linmoob ed Timplo a mampikasi. Sakey so Pariseo; sakey so sumisingil na buis. Samay Pariseo binmiig tan nanalagey a mampikasi, 'Misalamat ak ed sika, O Dios, ta aliwa ak a singa saray arum a totoon maagum, masaol, tan mikakaloguran. Misalamat ak, ta aliwa ak a singa saman a sumisingil na buis. Mamidwa ak a manaayuno ed loob na sakey simba, tan iiter koy kakaplo na amin a nanaalmoan ko!' Samay sumisingil na buis balet, arawdawiy nanalageyan to, tan ngalngali ag to itangwad tawen so lupa to. Tinapuktapuk toy pagew to tan inkuanto, 'O Dios, kasian mo ak pa a makasalanan!' Kuankod sikayo a sayan too sinmempet ya apirdona ray kasalanan to; balet samay Pariseo, andi. Ta siopamay mampaatagey ed sikaton dili, napaabeba; siopamay mampaabebad sikaton dili, napaatagey."
Ibanghilyo na Katawan.
2 comments:
Why was the tax collector's prayer better than the Pharisee's prayer?
Because the tax collector actually made a connection with God, but the Pharisee only made a connection with himself.
The tax collector's prayer makes a connection with God because it recognizes two things.
First, it acknowledges God's greatest quality in relation to fallen mankind, his mercy.
Second, the tax collector's prayer recognizes his need for that mercy.
The Pharisee's prayer shows no knowledge either of God's mercy or of his need for God; rather, it is an exercise in narcissism, in self-admiration.
God wants to connect with us, but he can only do so if we let him, and we can't let him if we don't think we need him.
no say panagdasal et pitotongtong ed dios et kabat tayon say dios et ari nepeg labat sirin ya manpa abeba tayo. duga? aminsan walay katongtong ko atagtagey so sirit to say antam no siopa kuankod isip ko..."Lotdit mo kitdi" pasensya la balet siad pangsinan mas antikey kasi "lusim!" imbatikan ko la. manigas ka kuankod sikato ingen. malastog met ya maong. et say panadpaabeba o "humility" et nanlapud latin "humus" dalin. ya singa gabay ton ibaga ya anggapoy dapat tayon ilastog.
Post a Comment