Epipanya na Katawan

ONONAN BABASAEN Isa. 60:1-6

Babasaen ya inaon ed libro na propita Isaias

Bangon ka, Jerusalem, tan sinag kan singa agew; Onsisinag ed sikay kagalangan na Katawan! Nakobutan na bilonget iray arum a bansa, balet onsinag ed sika so silew na Katawan, mansiansiad sikay liwawa na kiwawala to. Onsingger ed silew mo iray bansa, tan onsingger ed ibutay na balon agew mo iray arari.

Nengneng kad kaliber-liber mo, tan imanom no antoy nagagawa: Mantitipon iray totoom ya onsempet la! Manlapud arawin pasen iray anak mon lalaki; Naawit a singa ogogaw iray anak mon bibii. Nanengneng mo yan nagawa, et nalimbos kay liket; Manlukso-lukso ka lapud liket mo. Niakar ed sika iray kayamanan na saray bansa; Onsabin manlapud biek na dayat iray kayamanan da.

Manlapud Madian tan Efa onsabi ray baleg ya olup na kamilyo. Manlapu rad Seba a sankaawit day balituk tan insinso. Saray totoo ibaga ray maung a balitan nipaakar ed ginawa na Katawan!

Salita na Katawan.

Ebat a Salmo

E. Katawan, ondakmomod sika iray amin a bansa.

1. O Dios, ibangat mo pay ari a manintinsia onung na inkatonung mo; pinabang mo rad dilin kaptekan pian maptek so panoley tod saray totoom, tan matonung so panoley tod saray napapairap. E.

2. Ombolaslas komuy katonungan anggad mambibilay ni so ari, tan manari komuy kareenan, anggad onliliwawa ni so bulan. Manlapud dayat ya anggad dayat so sakop na nanarian to, manlapud Ilog na Eufrates ya anggad saray samput na dalin. E.

3. Saray arari na Espanya tan saray arari na saray isla et mangiter irad sikato na saray rigalo; saray arari na Arabia tan Etiopia et mangiter irad sikato na saray bagat. Ondakmomod sikato komun ya amin iray arari; manlingkur ed sikato ray amin a bansa. E.

4. Iyaagel to ray mairap-bilay ya ontatawag ed sikato, saray walad pankaukolan tan saray napapaolyan. Maabagey ed saray makapoy tan saray mairap-bilay; ilalaban toy bilay da ray walad pankaukolan. E.

KUMADWAN BABASAEN Ef. 3:2-3,5-6

Babasaen ya inaon ed sulat nen Pablo ed saray taga Efeso

Angangko, andi duaruwan abalitaan yo a lapud baleg a panangaroy Dios, impalima tod siak yan kimey a pankaabigan yo. Say Dios impuyan tan impaamta tod siak so maamut a plano to. Nansulat ak lad sikayoy antikey nipaakar ed saya. Nen inmonan panaon, sayan niamut a katwaan et ag akabatay katoowan, balet natan impaamta na Dios, diad panamegley na Ispiritu, ed saray masanton apostol tan saray masanton propita to. Saya so niamut a katwaan: diad panamegley na Maung a Balita, saray Hintil et kapara da ray Judio a mananawir na bindisioy Dios, nampara ran kabyangay saksakey a laman, tan minanabang irad sipay Dios lapud Cristo Jesus.

Salita na Katawan.

Alleluia
E. Alleluia. Anengneng mid bokig so bitewen to, tan linma kami dian ondakmomo ed Katawan. E. Alleluia.

Ibanghilyo Mat. 2:1-12

Babasaen ya inaon ed masanton ibanghilyo onung ed kinen Mateo

Nianak si Jesus ed baley na Betlehem ed Judea, nen manooley si Ari Herodes. Ag abayag, sinmabid Jerusalem iray makakabat a totoon nanlapud Bokig. Nantepet-tepet ira, “Iner so kawalaay nianak ya ari da ray Judio? Anengneng mi so bitewen ton linmetaw ed bokig, kanyan linma kami dian mangigalang ed sikato.”

Nen nadngelan to ya nen Ari Herodes mapalaloy inkagunigon to; ontan met na amin da ray taga Jerusalem. Impatawag ton amin iray manonan papari tan saray iskriba, ta tinepet tod sikara no iner so pangyanakan ed Cristo.

“Diad Betlehem ed Judea,” ebat da. “Ta onyay insulat na propita, ‘Sika, O Betlehem, diad dalin na Juda, aliwan sikay sankaabebaan ed saray manonan baley na Juda; ta panlapwan kay sakey a pangulo a mangiwanwan ed saray totook ya Israel.’”

Si Herodes impaawit ton anggapoy makaamta ira may makakabat a nanlapud Bokig, tan tinepet tod sikara no kapigay inletaw na bitewen. Insan to ra imbakid Betlehem tan imbilin tod sikara, “Apiger yon anapen itay ogaw. No nalmo yo la, ipakabat yod siak, pian makakar ak met a mangigalang ed sikato.”

Kadngel dad sayan bilin, linma la ra. Diad dalan, anengneng da lamet imay bitewen ya anengneng dad bokig a nanlapwan da. Tinombuk da may bitewen ya anggad intonda tod petek na kawalaay ogaw ya aanapen da. Agaylay liket da ed impakanengneng dad samay bitewen! Kaloob dad abung anengneng day ogaw tan si Maria ya ina to. Dinmakmomo ran angigalang ed samay ogaw. Impaway da ray awit dan rigalo a balituk, insinso, tan mira, insan da inter ed sikato.

Binilin iray Dios ed kugip da ya ag la ra ompapanengneng ed kinen Herodes, kanyan sananey lay dinalan dan pinmawil.

Ibanghilyo na Katawan.

4th Sunday of Advent (C)

ONONAN BABASAEN Mik. 5:2-5

Babasaen ya inaon ed libro na propita Mikias

Say Katawan kuanto, “Betlehem Efrata, sakey ka ed saray ankekelag a baley na Juda, balet sika so panlapwan na sakey a manoley ed Israel, a say sengeg na pamilya to et natonton ed saray inmona-ona ran panaon.”

Kanyan say Katawan paolyan ton naoleyan na saray kalaban da iray totoo to ya anggad say mangyanak ed samay manoley et inyanak to la. Diad satan saray kabansaan ton nibantak ed arum a bansa et mikasakey irad saray kapara ran totood Israel. No sikatoy onsabi, oleyan to ray totoo to diad panamegley na biskeg a manlalapud Katawan; walad sikato so dilin pakapanyari na Katawan a Dios. Mabilay ya arawid kaatapan iray totoo to, lapud birbiren na saray katoowan ed intiron mundo so inkatalonggaring to, tan sikatoy mangyakar na kareenan.

Salita na Katawan.

Ebat a Salmo

E. Katawan, ipaarap mo kami pad sika, ipanengneng mo pad sikami so panangasim, et nilaban kami.

1. Dengel mo kami pa, O Pumapastol na Israel; talineng mo kami pa,sika a pangulo da ray karnirom. Sika a manyodyorung ed tronom diad tagey da ray kirubin, ipanengneng mo pad sikami so pakayarim; gala pa ta ilaban mo kami! E.

2. Lingaw mo kamipa, O Dios a Makapanyarin-amin! Manlapud tawen osdungan mo kami pa; gala pa ta ilaban mo ray totoom! Gala pa ta ilaban mo yan ubas ya intanem mo, sayan malangwer nin ubas a pinabaleg mon mabisbiskeg! E.

3. Iyagel tan asikasom pa ray totoom a pinilim, say bansan ginawam a mabisbiskeg. Ag mi ka lan balut ibeneg; pansiansia mo kami pan mabilay, et idayew mi ka. E.

KUMADWAN BABASAEN Heb. 10:5-10

Babasaen ya inaon ed sulat nen Pablo ed saray Hebreo

Nen onla la diad mundo si Cristo, inkuantod Dios: “Ag mo labay iray bagat tan saray saklang, ingen,angiparaan kay laman para siak. Ag ka apaliket na saray bagat a popoolan, tan saray bagat a mamaandid saray kasalanan. Insan inkuanko, ‘Nia ak, O Dios! Sipaparaan ak a mangonur na linawam onung na nisulat nipaakar ed siak diad libroy Ganggan.’”

Inkuanton onaan, “Ag mo labay tan ag ka apaliket na saray bagat tan saray saklang, o saray bagat a popoolan tan saray bagat a para kasalanan.” Inkuanto ya, anggaman a nibagat ira onung ed Ganggan. Insan inkuanto, “Nia ak, O Dios! Sipaparaan ak a mangonur na linawam.” Inekal na Dios sirin so onaan a bagat tan insalat toy bagat nen Cristo. Lapud impangonur nen Jesu-Cristo na linaway Dios, inorasan to ray kasalanan tayo diad panamegley na impangibagat tod sikaton dili, tan duga la ya.

Salita na Katawan.

Alleluia
E. Alleluia. Aripen ak na Katawan; nasumpal komun so labay ton nagawad siak. E. Alleluia.

IBANGHILYO Luc. 1:39-45

+Babasaen ya inaon ed masanton ibanghilyo onung ed kinen Lucas

Maganat a linmay Maria ed sakey a nipokdul a baley na Judea. Kasabi tod abung nen Zacarias, inggalang toy Elizabet. Nen nadngel nen Elizabet imay impangigalang nen Maria, ginmalaw so ogaw ed eges to. Napnoy Ispiritu Santo si Elizabet tan inkuantod maksil a bosis, “Sikay sankaliketan ed amin da ray bibii! Maliket met so ogaw ya iyanak mo! Siopa ak a bisitaey ina na Katawan ko? Ta kadngel koy impangigalang mod siak, ginmalaw yay ogaw ed eges ko diad liket to. Agaylay liket mo, ta manisia kan nasumpal so impaibagad sikay Katawan!”

Ibanghilyo na Katawan.

3rd Sunday of Advent (C)

ONONAN BABASAEN Sof. 3:14-18

Babasaen ya inaon ed libro na propita Sofonias

Mankanta tan eyag kayod liket, sikayon totood Israel! Manggaya kayod intiron puso yo, sikayon totood Jerusalem! Pinatonda na Katawan so dusa yo; pinaandi ton amin iray kalaban yo. Kaolup yo so Katawan ya ari na Israel; anggapo la natan so nepeg yon takotan.

Onsabiy panaon ya ikuandad Jerusalem, “Ag ka natatakot, siudad na Sion! Ag mo palalaylayen iray taklay mo! Walad sika so Katawan a Dios mo; panaloen ka na pakayari to. Manliket so Katawan ed sika, tan lapud panangaro to itdan to kay balon bilay. Mankanta tan manliket ed sika, manliket a singa saray totoon manliliket ed pista.”

Salita na Katawan.

Ebat a Salmo

E. Maneyag tan mankanta kayod liket, ta walad pegley yo so matalonggaring tan Masanto na Israel.

1. Say Dios so manangilaban ko; manmatalek ak ed sikato, et ag ak antakot. Say Katawan iitdan to ak na pakayari tan biskeg; sikatoy manangilaban ko. Onung a say ambetel a danum et mangiiter na liket ed saray totoon napgaan, ontan met a saray totoo na Dios et manliket ira no ilaban to ra. E.

2. Misalamat kayod Katawan! Kerew kayod sikaton tulongan to kayo! Ibaga yod amin a bansa iray ginagawa to! Ibaga yod sikara ya ontan lay inkatalonggaring to! E.

3. Kantaan yoy Katawan, lapud saray ginagawa ton matalonggaring. Ipaamta yo ya ed sankamundoan. Maneyag tan mankanta kayod liket, sikayon manaayam ed Sion! Matalonggaring so masanton Dios na Israel, tan manaayam ed kawalaan da ray totoo to. E.

KUMADWAN BABASAEN Fil. 4:4-7

Babasaen ya inaon ed sulat nen Pablo ed saray taga Filipos

Manliket kayo lawas ed Katawan. Oliten ko: manliket kayo!

Ipanengneng yoy kaabigay linawa yod amin a katoowan. Magano lan onsabiy Katawan. Ag yo pampapagaay antokaman a bengatla. Kerew yo ingen ed Dios iray amin a nakaukolan yo diad panamegley na pikakasin tinekepay pisasalamat. Tan say kareenay Dios a palabsanan toy pakatalus na too so mangasikasod puso tan nunot yo, diad panamegley nen Cristo Jesus.

Salita na Katawan.

Alleluia
E. Alleluia. Walad siak so Ispiritu na Katawan; imbaki to ak a mangibagad saray mairap-bilay na Maung a Balita. E. Alleluia.

IBANGHILYO Luc. 3:10-18

+Babasaen ya inaon ed masanton ibanghilyo onung ed kinen Lucas

Tinepet na saray totood kinen Juan, “Antoy nepeg min gawaen sirin?”

Inmebat, “Say duaray kawes to nepeg ton iter so sakey ed anggapoy kawes to. Ontan met a say walay kanen to nepeg toy mangiter.” Wala ray sumisingil na buis a linman pabinyagan ed sikato. Tinepet da, “Maistro, antoy nepeg min gawaen?” “Ag kayo manisingil na masoluk nen say nepeg yon singilen,” ebat to. Wala met iray sondalon nantepet, “Sikami met ey? Antoy nepeg min gawaen?”

Inmebat ed sikara, “Ag kayo mimialay kuartad siopaman diad pamasoot o pangakusad sikato. Pasarag yoy suildo yo.” Binmiskeg so ilalo ray amin a totoo tan tinetepet dad sikaran dili no si Juan et sikato la kasiy Cristo ya aalagden da. Kanyan inkuanen Juan ed sikaran amin, “Siak bibinyagan ta kayo ed danum, balet walay manomtombuk ed siak. Sikatoy makapanyari nen siak tan ag ak manepeg ya anggan mangokbar na sandalya to. Sikato binyagan to kayo ed Ispiritu Santo tan apoy. Sankabembenan toy bigaon pantaep to na trigo. Tiponen toy ilik ed kamalir to, balet poolan toy taep ed apoy ya ag balut naerep.”

Amayamay niy imbabangat nen Juan diad pampupulong toy Maung a Balita.

Ibanghilyo na Katawan.

2nd Sunday of Advent (C)

ONONAN BABASAEN: Bar. 5:1-9

Babasaen ya inaon ed libro na propita Baruc

Jerusalem, ekal moy baliwan ya insolung mo diad paneermen tan pandadageyem mo, tan isolung moy andianggaan a karlangan na kagalangay Dios. Ikolibemben moy inkatonung na Dios. Itoon mod olom so korona na kagalangay Andi-anggaan a Dios. Ipanengneng na Dios so karlangan mo ed balang bansa diad tapew na dalin. Andi-anggaan ya ikuantod sika: "Manlalapud inkatonung mo so kaarawim ed kaatapan, tan manlalapud panangarom ed siak so karlangan mo."

"Bangon ka, Jerusalem, ta manalagey ka ed toktok na palandey; nengneng mo no iner so panitiponan na Dios, say Masanto, ed saray anak mon nanlapud bokig tan sagur. Panggagayagaan day impakanunot na Dios ed sikara. Jerusalem, saray anak mo et inyakar ed arawi na saray kalaban da; kasali-sali ran tinmaynan ed sika, balet ipapawil irad sika na Dios, a nilogan iran kataruk na karlangay ari. Ingganggan na Dios a napaabebay balang atagey a palandey tan saray andi-anggaan a kapokdulan; ingganggan ton natabunan iray patar tan napalanas so dalin, pian makasempet, diad kagalangay Dios, iray totood Israel tan anggapoy maoges a nagawad sikara. Lapud ganggan na Dios, onlesa iray katakelan na ambalingit iran kakiewan, pian walay nasiruman na saray totood Israel. Say Dios et iwanwan ton onsempet ed abung so israel. Ompawil iran walay baleg a gayaga, niwanwan ira na panangasi to tan inkatonung, to, tan napaliberan ira na liwaway mapagalang a kiwawala to.

Salita na Katawan.

Ebat a Salmo

E/. MAKAPAKELAW IRAY GINAGAWA NA KATAWAN PARA SIKAMI; NAPNO KAMI NA LIKET.

1. Nen say Katawan et impawil to kamid Jerusalem,singa labat sakey a kogip! Agaylay impaneelek-elek tan impankankanta mi lapud liket! E/.
2. Insan inkuan na saray arum a bansa, "Matalonggaring iray ginagawa na Katawan para sikara!" Peteg a makapakelaw iray ginagawa na Katawan para sikami; ontan lay liket mi! E/.

3. Katawan, paaligwas mo kami pa lamet, a singa pamaparanum na oran ed saray nakatan a kolus. Iyabuloy mo pan saray nanaakis legan dan mantatanem et manani ran malikeliket! E/.

4. Saray nanaakis legan dan iyaakar iray bini et ompawil iran maliket a mangankanta lapud liket da, a sankaawit da ray naani ra. E/.

KUMADWAN BABASAEN: Fil. 1:4-6,8-11

Babasaen ya inaon ed sulat nen Pablo ed saray taga Filipos

Kapag pikasi ta kayon amin, makaliliket ak, lapud intulong yod impanpupulong koy Maung a Balita, nanlapud samay inmonan agew ya impangawat yo ya anggad natan. Ag ko panduaruwaan ya isumpal na Dios so inggapo tod sikayon maung a gawa, anggad isabi na Agew nen Jesu-Cristo. Kabat na Dios a say pampilpilalek kon makapinengneng ed sikayo et manlalapud dilin panangaro nen Cristo Jesus.

Pikakasik ya ombaleg lan ombaleg komuy panangaro yon tinekepay kakabatan tan nagnap a pakatalus, pian napili yoy sankamaungan ed amin a bengatla. Diad ontan nasabian kin malinis tan anggapoy pakabalawan no Agew nen Cristo. Napano kid satan na matonung iran kagagawa a si Jesu-Cristo labat so makapangiter, a pakagalangan tan pakadayewan na Dios.

Salita na Katawan.

Alleluia
E/. Alleluia. Iparaan yoy dalan na Katawan, petek yoy panakaran to! Nanengneng na amin a katoowan so panangilaban na Dios!

IBANGHILYO Luc. 3:1-6

+ Babasaen ya inaon ed masanton ibanghilyo onung ed kinen Lucas

Kumalabinliman taon la na panooley nen Impirador Tiberio. Si Poncio Pilato so gobirnador na Judea, si Herodes so manoley ed Galilea, tan si agi ton Felipe so manoley ed Iturea tan Traconite. Si Lisanias so manoley ed Abilinia. Di Anas tan Caifas iray pangulon papari. Diad sayan panaon, sinmabid kalawakan so salitay Dios ed kinen Juan ya anak nen Zacarias. Niliber to sirin so intiron lugar na Jordan. Impupulong to, "Magbabawi kayod saray kasalanan yo tan mampabinyag kayo, et say Dios pirdonaen to kayo." Agawa ya onung na insulat nen propita Isaias ed libro to: "Walay mambabandod kalawakan, 'Iparaan yoy dalin na Katawan tan apiger yoy panakaran to! Nakaukolan a natabunan iray abeban pasen tan napalanas iray nipokdul tan nipalandey a pasen. Nakaukolan a napetek iray malikon daladalan, tan napatar iray matibagkul a daladalan. Tan nanengneng na amin a daladalan. Tan nanengneng na amin a katoowan so panangilaban na Dios!' "

Ibanghilyo na Katawan.

First Sunday of Advent (C)

ONONAN BABASAEN: Jer. 33:14-16

Babasaen ya inaon ed libro na propita Jeremias

Inkuan na Katawan, "Onsabiy panaon a sumpalen koy sipan kod saray totood Israel tan Juda. Diad satan a panaon mamili ak na sakey ya ari a kabyangay boleg nen David. Manoley ed intiron dalin onung na kaptekan tan katonungan. Niagel tan mambilay ya arawid kaatapan iray totood Juda tan Jerusalem. Say siudad natawag na 'Say Katawan a Kilalaban Tayo."

Salita na Katawan.

Ebat a Salmo

E/. IYAATAGEY KOD SIKA, KATAWAN, SO KAMARERWAK.

1. Ibangat mo pad siak so linawam; ipaamtam ed siak, O Katawan. Ibangat mo ak pan mambilay onung ed katwaan mo, ta sikay Dios a Manangilaban ko. Manmatalek ak ed sika lawas. E/.

2. Matonung tan maung so Katawan, kanyan ibabangat tod saray makasalanan so dalan a nepeg dan tombuken. Itotonton to ray mapaabeba ed maptek a dalan, tan ibabangat tod sikaray linawa to. E/.

3. Katekep na aro tan katooran so pangiwawanwan tod saray manusumpal na impisipanan to tan saray ganggan to. Kaaro na Katawan iray matoluk ed sikato, tan papaletan toy impisipanan tod sikara. E/.

KUMADWAN BABASAEN: 1 Tes. 3:12-4:2

Babasaen ya inaon ed ononan sulat nen Pablo ed saray taga Tesalonica

Pabalegen tan palaknabey Katawan komun so panaarowan yo tan say panangaro yod arum a totoo, a singa panangaro mid sikayo. Pabiskegen tod satan so linawa yo, tan magmaliw kayon masanto tan anggapoy pakabalawan ed arap na Dios tan Ama tayo, no onsabiy Katawan tayon Jesus a kaiba ton amin iray totoo to.

Kaonuran, peteg a mambibilay kayon makapaliket ed Dios onung na naaralan yod sikami. Natan balet, kerewen tan simbawaen mikayo diad ngaran na Katawan a Jesus, a lalon mambilay kayon makapaliket ed Dios. Ta amta yo ray inter mid sikayon bangabangat a nanlapud Katawan a Jesus.

Salita na Katawan.

Alleluia

E/. Alleluia. Katawan, ipanengneng mo pad sikami so panangasim, tan itdan mo kami pay panangilaban mo.

IBANGHILYO Luc. 21:25-28, 34-36

+ Babasaen ya inaon ed masanton ibanghilyo onung ed kinen Lucas

Inkuanen Jesus ed saray disipulo to:

"Onletaw iray tanda ed agew, bulan, tan saray bitewen. Diad dalin, saray bansa nagolo rad kataktakot dad saray daluyon tan say ungol na dayat. Patey-pateyan iray totood takot da diad panalagar dad kairapan ya onsabid sankamundoan, ta ag natombuk na saray pakayarid liwang so gendat a kinaoksuy da. Insan nanengneng day Anak na Too ya onsasabin walad lorem tan walaay pakayari tan baleg a kagalangan. No ginmapo la ra yan nagawa, alagey kayo tan tangay kayo, ta asingger lay kilalaban yo.

"Manalwar kayo! Ag kayo mapalalon kapaakan tan kapabuek, tan ag kayo met kapagunigon ed panagbilay yo, ta ompan biglan onsabid sikayo yan Agew tan ag kayo akaparaan. Ta diad sayan Agew onsabid amin a katoowad intiron mundo ya ag da naamamtaan. Kanyan nakaukolan a sipaparaan kayo lawas tan ag yo totoondaay mampikasi, pian nawalaan kayoy biskeg ya ompaliis ed amin da ra yan nagawa, tan makapiarap kayod Anak na Too."

Ibanghilyo na Katawan.

Solemnity of Christ the King (B)

ONONAN BABASAEN: Dan. 7:13-14

Babasaen ya inaon ed libro na propita Daniel

Legan na sayan pasingayew ed labi, anengneng koy singa sakey a too. Onsisingger ed siak, ya aliber na aray lorem, tan linmad samay mambibilay ya anggad angga tan niparontal ed sikato. Naitdan imay too na pakaoley, kagalangan, tan pakayari na ari, pian makapanlingkur ed sikato iray totoo ed amin a bansa ya anggan antoy kolor na baog da tan salira ra. Mansiansia so pakaoley to, tan ag mangangga so panarian to.

Salita na Katawan.

Ebat a Salmo

E/. Ari so Katawan; akawesan na kagalangan.

1. Ari so Katawan; akawesan na kagalangan tan abalkesan na biskeg. E/.

2. Niletneg a malmalet so mundo kanyan ag balut nagiing. Manlapud gapoy gapo malet a niletneg so tronom, O Katawan, tan wala ka la kasakbayan na inkiwalay panaon. E/.

3. Magnayon iray ganggan mo, Katawan, tan tuan masanto so Timplom ya anggad angga. E/.


KUMADWAN BABASAEN: Pu. 1:5-8

Babasaen ya inaon ed libro na Puyan

Si Jesu-Cristo et sikatoy matoor a tasi, say pangulowan ya Anak ya inmolid bilay, tan sikato so manoley ed saray arari diad tapew na dalin.

Inaro itayo nen Jesu-Cristo tan diad panamegley na dala to, imbolus to itayod saray kasalanan tayo. Ginawa to tayo met a sakey a panarian tan impagmaliw to tayon papari a manlingkur ed Dios tan Ama to. Say galang tan pakayari so wala ya anggad angga ed Jesu-Cristo! Amen.

Nengneng yo, sikatoy onsabi a walad saray lorem! Nanengneng na amin a katoowan, anggan saray anoyuk ed sikato. Lapud sikato, onermen ya amin iray katoowad tapew na dalin. Peteg a nagawa! Amen.
"Siak so Alpha tan say Omega," kuay Katawan a Dios a Makapanyarin-amin, say Dios natan, nen saman, tan say onsabi.

Salita na Katawan.

Alleluia Mar. 11:10

E/. Alleluia. Nabindisionan komun so manawi na panarian nen David ya ama tayo; nabindisionan komun so onsabid ngaray Katawan.

IBANGHILYO: Jn. 18:33-37

+Babasaen ya inaon ed masanton ibanghilyo onung ed kinen Juan

Linmoob lamet si Pilato ed palasio, tinawag toy Jesus tan tinepet to, "Sikay ari da ray Judio?"

Inmebat si Jesus, "Nanlapud dilin isip mo yan tepet, odino imbagay arum ed sika so nipaakar ed siak?"

Inmebat si Pilato, "Judio ak ta? Saray kabaleyan mo tan saray manonan pari so angiparontal ed sikad siak. Anto tay ginawam a?"

Inmebat si Jesus, "Aliwan diad sayan mundo so kawalaay panarian ko. No diad sayan mundo so kawalaay panarian ko, akilaban ira komuy totook, pian ag ak nipalimad saray Judio. Balet aliwan diad sayan mundo so kawalaay panarian ko!"
Tinepet nen Pilato, "No ontan sirin, sakey kan ari?"

Inmebat si Jesus, "Ibabagam la a sakey ak ya ari. Say makasengeg no akin et nianak tan linma ak ed sayan mundo et say pantasik ed katwaan. Siopamay walad katwaan ondengel ed siak."

Ibanghilyo na Katawan.

33rd Sunday in Ordinary Time (B)

ONONAN BABASAEN: Dan. 12:1-3

Babasaen ya inaon ed libro na Propita Daniel

Samay anghil a linen so kawes to inkuanto, “Diad satan a panaon ompanengneng imay matalonggaring ya anghil Miguel a mangguaguardiad saray totoom. Insan la ondalan so panaon na ontan lan kairapan ya ag nin balut dinmalan nanlapu lad inletneg da ray bansa. No onsabi tan a panaon, nilaban ya amin iray totoo na bansa a nisulat so kangaranan dad libro na Dios. Onolid bilay iray amayamay ed saray inaatey la: manliket ed bilay ya andi-anggaan iray arum, balet manliknay andi-anggaan a kababaingan iray arum. Onsinag a singa liwaway tawen iray makabat a Pangulo. Ontan met, saray ananggoyur ed saray amayamay a totoo diad panggawa ray inkatonung et anggad anggan onsinag iran singa saray bitewen.”

Salita na Katawan.

Ebat a Salmo Sal. 16:5,8/9-10/11

E/. Iyagel mo ak pa, O Dios; sikay ilalok.

1. Sika, Katawan, so amin a kayaryan ko, iiter moy amin a nakakaukolan ko; walad sanduan limam so bilay kod arapen. Ag ko lawas nalingwanan so kiwawalay Katawan; walad abay ko, tan ag ak nisigensigen na antokaman. E/.

2. Kanyan maliket tan magayaga ak, tan anggapon balut so pagpasak, ta iyaagel mo ak ed pakayari na patey. Matoor a nanlilingkur ak ed sika, kanyan ag mo ak ikaindan ed pasen a panaayaman da ray inaatey. E/.

3. Ipaamtam ed siak so dalan a mamaarap bilay; say kiwawalam papanoen to ak na gayaga tan iitdan to ak na liket ya anggad angga. E/.

KUMADWAN BABASAEN: Heb. 10:

11-14,18

Babasaen ya inaon ed sulat ed saray Hebreo

Inagew-agew a manalagey tan manlingkur so balang pari da ray Judio, tan maminpigan mangisaklang na nampaparan bagat. Balet ag makapaandiy kasalanan ira yan bagat. Si Cristo, balet, amimpinsan ya angibagat lapud saray kasalanan, tan duga la ya. Kasumpal to, inmirung ed nikawanay Dios. Manaalagar ya anggad say Dios napasuko tod sikato ray kalaban to. Kanyan diad panamegley na saksakey a bagat, ginawa ton nagnap ya andi-anggaan iray naorasan ed kasalanan.

Kanyan nen apirdona la ra ya, ag la nakaukolay bagat a pangekal na saray kasalanan.

Salita na Katawan.

Alleluia Luc. 21:36

E/. Alleluia. Nakaukolan a sipaparaan kayo lawas tan ag yo totondaay mampikasi, pian manepeg kayon miarap ed Anak na Too. Alleluia.

IBANGHILYO Mar. 13:24-32

+ Babasaen ya inaon ed masanton ibanghilyo onung ed kinen Marcos

Inkuanen Jesus ed saray disipulo to: “Kasumpal na satan a kairapan, ombilonget so agew tan ag la onsinag so bulan. Napelag iray bitewen a manlapud tawen, tan saray pakayarid liwang ag da natombuk so gendat a kinaoksuy da. Insan nanengneng day Anak na Too a walad saray lorem tan onsasabin walay baleg a pakayari tan kagalangan. Ibaki tod apatiran suyok na mundo ray anghil to tan, manlapud amin a pasey mundo, tiponen da iray totoon piniliy Dios.

“Aral yoy bangat na manlapud kiew ya igos. No onkolaney tan mambulong la ray sanga sanga to, amta yon asingger lay tiagew. Ontan met a no nanengneng yo la ra yan nagagawa, naamtaan yon asingger lay panaon. Ngalngali lan onggapo ingen. Tandaan yo ya! Nagawa ra yan amin kasakbayan a naandi ray totood sayan panaon. Naandipat so tawen tan dalin, balet ag balut naandipat iray salitak.

“Balet anggapoy mikabat no kapigan so isabi na sayan agew o oras. Ag kabat na anggan saray anghil ed tawen, ni say Anak. Say Ama labat so mikabat.”

Ibanghilyo na Katawan.

32nd Sunday in Ordinary Time (B)

ONONAN BABASAEN: 1 Ar. 17:10-16
Babasaen ya inaon ed ononan libro na Saray Arari

Linmad Sarepta si Elias; nen manasingger lad puirta na baley akanengneng na sakey a biin balo a mandodokdok na kiew ya itotongo. Inkuantod sikato, "Itdan mo ak pay danum ya inomen." Nen oonla lan mangala may balo na inomen, impaabot ton inkuan, "Iyalaan mo ak pa met na pigaran tinapay."

Inmebat imay bii, "Diad ngaran na mabilay a Katawan a Dios mo, sambaan kod sikan anggapoy tinapay ko. Sankaakup labat so arinak a walad pasig tan dagdaiset a larak na oliban walad garapon. Linma ak diad mandokdok na itongo, insan ko isempet, ta iparaan ko may arinak a para siak tan say anak kon laki. Kaonuran la man a kanen mi, insan ompatey kami lad eras."

"Ag ka mapaga," kuanen Elias ed sikato. "Laka la, ta iparaan moy kanen yo. Balet igawaan mo ak ni ed satay walad sikan arina na sakey a tinapay, insan mo dia iyakar. Kayarim iparaan moy kera para sika tan say anak mon laki. Ta onyay inkuan na Katawan a Dios na Israel, 'Ag naandian na arina so pasig, tan ag naandian na larak so garapon anggad agew a siak, say Katawan, et mangipelag ak na oran.' "

Anempet imay balo tan ginawa toy onung na imbagad sikato nen Elias, et awalaan iran amin na nakan ed amayamay ya agew. Onung na insipan na Katawan, diad panamegley nen Elias, ag naandian na arina so pasig tan ag naandian na larak so garapon.

Salita na Katawan.

EBAT A SALMO
E/. Idayew moy Katawan, O kamarerwak!
1. Say Dios nen Jacob kikilingan tod panagsintinsia to iray napapairap, tan iitdan toy nakan iray narasan. Say Katawan ibobolus to ray priso. E.

2. Say Katawan iitdan toy pakanengneng iray bulag. Itatanduro to ray atumba; aaroen to ray matonung a totoo to. Iyaagel to ray sangkailin manaayam ed bansa tayo. E.

3. Tutulongan to ray balo tan saray olila, balet iyaakar to ray totoon maoges ed kaderalan da. Say Katawan et ari ya anggad angga. Say Dios mo, O Sion, manoley ed amiy panaon. E.

KUMADWAN BABASAEN: Heb. 9:24-28
Babasaen ya inaon ed sulat ed saray Hebreo

Si Cristo ag linmoob ed masanton pasen a ginaway too, a kaparpara labat na petepeteg a pasen. Ingen, linmoob ed tawen tan ilalaman to itayo ed arap na Dios. Say Pangulon Pari da ray Judio onloloob a tinaon-taon ed Sankasantosan a Pasen, tan awit toy dala na ayep. Balet si Cristo ag linmoob a mamimpiga-pigan mangibagat na sikaton dili. Ta no andi, nakaukolan komun a mamimpigapigan ompatey nanlapu lad inkapalsay mundo. Balet natan aminsan labat a nampanengneng, nen mansasamput la ray panaon, pian napaandi toy kasalanan, diad panamegley na impangibagat tod sikaton dili. Nigetar ed balang too a maminsan ya ompatey, tan kasumpal to sintinsiaan na Dios. Ontan met, aminsan a nibagat si Cristo, pian nasakbat to ray kasalanan na amayamay a totoo. Mampanengneng a kumadwa, balet aliwan lapud kasalanan, no ag ingen lapud ilaban to ray manaalagar ed sikato.

Salita na Katawan.

Alleluia
E/. Alleluia. Manalwar tan mamparaan kayo, ta ag yo amta so isabi na Anak na Too. E/. Alleluia.

IBANGHILYO Mar. 12:38-44
+ Babasaen ya inaon ed masanton ibanghilyo onung ed kinen Marcos

Diad pambabangat to, inkuanen Jesus ed sikara, "Manalwar kayod saray iskriba a labalabay day akar-akar ya andokey so saloy na kawes da, tan igalgalang irad publiko. Labalabay dan pilien iray manonan yorungan ed saray sinagoga tan saray sankaabigan a pasen ed saray ponsia. Kakatkatan da ray balon bibii, insan andorokey so pampikasi ra a pandisimula rad gagawaen da. Lalon ambelat so dusa ra!"

Sanen inmirung si Jesus ed abay na panagpelagan ed Timplo, inimano to ray totoo a mangipepelag na kuarta. Dakel iray totoon mamayaman ya angipelag na ankakabaleg a kantidad. Nen inmasingger so sakey a balon bii, angipelag na duaran sinsilyo a mankantidad na dagdaiset. Tinawag to ray disipulo, tan kuantod sikara, "Kuankod sikayo a sayan mairap-bilay a balo et angipelag na dakel ni nen say impelag na siopaman ed sikaran amin. Ta amin da ray arum angipelag ira labat na nasosolukan da balet sayan bii, anggan mairap so bilay to, inter to lan amin so walan pambilay to."

Ibanghilyo na Katawan.

Solimnidad na Saray Sasanto (B)

ONONAN BABASAEN Pu. 7:2-4, 9-14

Say libro na Puyan so mangipaparontal na saray nayarin nagawa diad kasamputay panaon: saray sasantos, saray matuor ya mananumbok nen Cristo, so akaalagey diad arapan na trono na Dios ya akasulong na ampoti tan maneemben na sangay palmera a simbolo na impanalod kasalanan tan patey.

Babasaen ya inaon ed libro na Puyan

Siak, si Juan, anengneng ko met ya ontatagey a nanlapud bokig so sananey ya anghil a walad sikatoy timbri na mabilay a Dios. Inkelyaw tod saramay apatiran anghil ya initday Dios na pakayarin manderal na dalin tan dayat, "Ag yo ni dederaley dalin, o say dayat, o saray kiew, anggad ag ni amarkaay muling da ray aripen na Dios tayo." Insan nibagad siak so bilang da ray amarkaan: sanlasus, apataplo tan apat a libo a nanlapud amin a boleg na saray totood Israel.

Kasumpal to ya, anengneng koy balbaleg a dagop na katoowan ya anggapoy makabilang lapud karakel da. Nanlapu rad amin a bansa, tribu, totoo, tan salita. Manalalagey irad arap na trono tan samay Kordiro. Akakawes iray ampoti tan sankabembenan da ray palapa na palma. Ineyag day maksil, "Say kilalaban manlalapud Dios tayo ya akayorung ed trono, tan say Kordiro!" Inmalagey ya amin iray anghil a walad kaliber-liber na trono, saramay mamatakken, tan saramay apatiran mabilay a pinalsa. Dinmakmomo rad arap na trono tan angigalang irad Dios. Inkuanda, "Amen! Anggad angga komun a kayaryay Dios tayo so dayew, galang, kakabatan, pisasalamat, tanduro, pakayari, tan biskeg! Amen!"

Tinepet ed siak na sakey ed saramay mamatakken, "Siopa ra tay totoon akaampoti, tan iner so nanlapwan da?"

"Ag ko amta," ebat ko. "Sikayoy makaamta."

Inkuantod siak, "Sikara yay totoon akaliktar ed baleg a kairapan. Inorasan tan pinapoti ray kawes da ed dala na Kordiro."

Salita na Katawan.

EBAT A SALMO

E/. KATAWAN, SIKARA YAN TOTOO SO MAMPIPILALEK A MAKANENGNENG ED LUPAM.

1. Kayaryay Katawan so mundo tan amin a logan to; kien toy dalin tan amin a manaayam ed dalin. Inletneg tod aralem a danum diad dalem na dalin tan inlira tod dalem na dayat iray pundasion to. E.
2. Siopay manepeg ya onkalab ed palandey na Katawan? Siopay nayarin onloob ed masanton Timplo to? Saray totoon malinis so gawa ra tan say kanunotan da, ag ira mangigagalang ed saray diriyos, tan ag da isisipan so ag da nagawaan. E.
3. Say Katawan bindisionan tan ilaban to ra; say Dios ibawag to ran anggapoy kasalanan. Sikara yan totoo so onsisingger ed Dios, tan oonlad arap na Dios nen Jacob. E.

KUMADWAN BABASAEN 1 Jn. 3:1-3

Babasaen ya inaon ed ononan sulat nen Juan

Nengneng yo so ontan lan panangaroy Ama ed sikatayo! Diad kabaleg na panangaro to atawag itayon anak na Dios-tan saya et tua. Ag itayo kabat na sankamundoan, ta say sankamundoan ag to akabat so Dios. Inararon anak, sikatayo natan so anak na Dios, balet aliwa nin malinew no antoy pagmaliwan tayo. Anggaman ontan, amta tayo a diad ipawil dia nen Cristo, magmaliw itayon singa sikato, ta nanengneng tayo diad dilin inkasikato. Balang sakey a wala yan ilalo tod Cristo linisan toy panagbilay to, a singa si Cristo et malinis.

Salita na Katawan.

ALLELUIA
E/. Alleluia. Dago kayod siak, kuay Katawan, amin yon nakekesawan ed panaawit yoy ambelat, ta pampainawaen ta kayo. E/. Alleluia.

IBANGHILYO Mat. 5:1-12

+Babasaen ya inaon ed masanton ibanghilyo onung ed kinen Mateo

Anengneng nen Jesus a dakerakel iray totoo, kanyan linmad nipokdul a pasen tan inmirung diman. Dinago na saray disipulo to, tan onyay imbangat tod sikara:

"Maliket iray mamibirbir na pankaukolan dad maispiritu ran bengatla, ta kayaryan day Panarian na tawen!
"Maliket iray maneermen, ta ligliwaen iray Dios!
"Maliket iray mapaabeba, ta tawiren day dalin ya insipay Dios!
"Maliket iray mampipilalek a manumpal na linaway Dios, ta iter tod sikaray pampilalekan da!
"Maliket iray mapangasi, ta kasian iray Dios!
"Maliket iray malinis so puso ra, ta napinengnengan day Dios!
"Maliket iray manggagaway polaing na mareen a panoolup da ray katoowan, ta ibilang iray Dios ya anak to!
"Maliket iray napapairap lapud panusumpal day linawa na Dios, ta kayaryan day Panarian To!
"Maliket kayo no sikayoy pabpabaingan, parpairapen, tan pagpaogesen na totoo lapud disipulo ta kayo. Manliket tan manggayaga kayo, ta balbaleg so tumang yod tawen. Onya met so impampapairap na totood saray propita ya akaonan nambibilay nen sikayo."

Ibanghilyo na Katawan.

30th Sunday in Ordinary Time (B)

ONONAN BABASAEN: Jer. 31:7-9

Babasaen ya inaon ed libro na Propita Jeremias

Say Katawan kuanto, “Mankanta kayod liket para Israel, say sankatalonggaringan ed saray bansa. Kanta yoy imno na pangidayew, ‘Inyagel na Katawan iray totoo to, inliktar ton amin iray akeraan.’ Alaen ko rad bansa ed baybay tan tiponen ko ran manlapud saray sokung na mundo.

Milad sikara iray bulag tan saray lopuy, saray malukon tan amin da ray paanak-anak. Ompawil ira a sakey a matalonggaring a bansa. Diad liket dan ompapawil iray totook ag da napokpokay interter na lua ra, mampipikasi ra legan ko ran iwawanwan. Iwanwan ko rad gilig na managagos a danum, diad mablak a dalan pian ag ira niparukol. Singa ama so pasen ko ed Israel, et si Efraim so sankapangulowanan ya anak ton laki.”

Salita na Katawan.

Ebat a Salmo

E/. Makapakelaw iray ginagawa na Katawan para sikami; napno kami na liket.

1. Nen say Katawan et impawil to kamid Jerusalem, singa labat sakey a kogip! Agaylay impaneelek-elek tan impankankanta mi lapud liket! E.

2. Insan inkuan na saray arum a bansa, “Matalonggaring iray ginagawa na Katawan para sikara!” Peteg a makapakelaw iray ginagawa na Katawan para sikami; ontan lay liket mi! E.

3. Katawan, paaligwas mo kami pa lamet, a singa pamaparanum na oran ed saray nakatan a kolus. Iyabuloy mo pan saray nanaakis legan dan mantatanem et manani ran malikeliket! E.

4. Saray nanaakis legan dan iyaakar iray bini et ompawil iran maliket a mangankanta lapud liket da, a sankaawit da ray naani da. E.

KUMADWAN BABASAEN: Heb. 5:1-6

Babasaen ya inaon ed sulat ed saray Hebreo

Balang Pangulon Pari et apilid saray totoo tan niganan mangilaman ed sikara diad panlingkur ed Dios. Mangyapay na saray saklang tan saray bagat lapud saray kasalanan. Lapud wala met so dilin kakapoyan to, nayarian to, nayarian to ya anosan iray anggapoy amta tan nalilingo. Lapud wala met so dilin kakapoyan to, nakaukolan a mangibagat aliwa labat a para saray kasalanan na too, no ag ingen pati saray dilin kasalanan na too, no ag ingen para saray dilin kasalanan to. Anggapoy siopaman a makapangikawes ed sikaton dili na kagalangay Pangulon Pari. Say Dios a dili so mamilid sikato, a singa inkapili nen Aaron.
Ontan met ya aliwan si Cristo so angikawes ed sikaton dili na kagalangay pangulon pari. Ingen, pinili na Dios ya angikuan ed sikato, “Sikay Anak ko, natad sayan agew nagmaliw ak ya Amam.” Inkuanto met ed sakey nin partiy Masanton Sulat, “Pari kan anggad angga, onung ed inkapari nen Melkisedek.”

Salita na Katawan.

Alleluia

E/. Alleluia. Nagmaliw a too so Salita na Dios tan akiayam ed sikatayo. Inter tod saray angawat ed sikato so pankanepegan a magmaliw iran anak na Dios. E/. Alleluia.

IBANGHILYO Mar. 10:46-52

+ Babasaen ya inaon ed masanton ibanghilyo onung ed kinen Marcos


Sinmabiy Jesus ed Jerico a kaiba to ray disipulo to tan saray amayamay a totoo. Nen ontataynan la rad man, walay sakey a toon bulag a manngaray Bartimeo ya anak nen Timeo. Manyodyorung ed gilig na dalan a mipapayabol. Nen nadngel ton si Jesus a taga Nazaret so onlalabas, tinmawag na maksil, “Jesus, Anak nen David! Kasian mo ak!”

Dakel iray amasnuk ed sikato tan imbaga ran mandeen, balet lalon tinmawag na maksil, “Anak nen David, kasian mo ak!” Tinmonday Jesus tan impatawag to. Kanyan tinawag da may bulag tan kuanda, “Pabiskeg moy linawam. Alagey ka, ta patatawag to ka.” Inekal toy kolibemben to, biglan inmalagey, tan sinmingger ed kinen Jesus. Tinepet nen Jesus ed sikato, “Antoy labay man gawaen kon para sika?” Inmebat imay bulag, “Maistro, labay koy makanengneng.” Inkuanen Jesus, “Inmabig ka la, lapud pananisiam. Nayarian mo lay onla.” Inmabig ed saman a bekta tan tinmombuk ed kinen Jesus.

Ibanghilyo na Katawan.

29th Sunday in Ordinary Time

ONONAN BABASAEN: Isa. 53:10-11

Babasaen ya inaon ed libro na propita Isaias

Say Katawan kuanto, “Linawak a sikatoy manirap; sakey a bagat a makapirdonay kasalanan so impatey to. Kanyan nanengneng to ray kabyangay boleg to; andokey so pambilay to, tan diad panamegley to maung so pansumpalay getmak. Kayari na panirap to legan ton manbilay, nawalaan lamet na gayaga; naamtaan to ya aliwan andi-kakanaan so impanirap to. Say matoor ya aripen ko a pakakaliketan ko et sakbaten toy dusa na amayamay a totoo tan, lapud sikato, pirdonaen ko ra.”

Salita na Katawan.

Ebat a Salmo

E/. Katawan, wala komun ed sikami so panangasim, bangta manmamatalek kamid sika.

1. Tua ray salita na Katawan, tan napanmatalkan ya amin iray gawgawa to. Inaroy Katawan so katonungan tan say kaptekan; say mundo napno na ag mangoman a panangaro to. E.

2. Imanoen na Katawan iray mangigagalang ed sikato, saray manmamatalek ed ag mangoman a panangaro to. Ilalaban to rad patey, pambibilayen to ra no panaoy eras. E.

3. Say Katwan so paniilaloan tayo; sikatoy mananulong tan manangyagel tayo. Katawan, say ag mangoman a panangarom et wala komun ed sikami, bangta manmamatalek kamid sika. E.

KUMADWAN BABASAEN: Heb. 4:14-16

Babasaen ya inaon ed sulat ed saray Hebreo

Pabiskegen tayo lawas so pananisia tayo, ta walay matalonggaring a Pangulon Pari tayo a linmoob ed kawalaay Dios--si Jesus ya Anak na Dios. Sayan Pangulon Pari tayo walay pililikna tod saray kakapoyan tayo, ta asali ton singa sikatayo so amin a klasiy tukso, bale ag nankasalanan. Kanyan pakpelen tayoy linawa tayo ya onsingger ed tronoy mapangasin Dios, pian naawat tayoy panangasi tan baleg a panangaroy Dios; sikara yay ontulong ed sikatayo no oras na pankaukolan.

Salita na Katawan.

Alleluia

E/. Alleluia. Mansalita ka, O Katawan; onderengel so aripen mo! Walad sika ray salitan mangiiter na bilay ya andi-anggaan. E/. Alleluia.

IBANGHILYO Mar. 10:35-45

+ Babasaen ya inaon ed masanton ibanghilyo onung ed kinen Marcos

Inmasingger ed kinen Jesus ira di Santiago tan Juan ya anak nen Zebedeo. Inkuanda, “Maistro, pikasi mi pan iter moy kekerewen mi.”

“Antoy labay yon gawaen ko para sikayo?” tinepet nen Jesus ed sikara.

Inmebat ira, “Iyabuloy mo pa komun ya onyorung kami ed nikawanan tan nikawigim, no onyurong ka lad trono na Panarian mo.”
Inkuanen Jesus ed sikara, “Ag yo amtay kekerewen yo. Nayarian yo kasiy oninom ed kupan nepeg kon inoman? Nayarian yo kasiy mampabinyag ed pampabinyagan ko?”

“Nayarian mi,” ebat da. Inkuanen Jesus ed sikara, “Nayarian yoy oninom ed kupan inoman ko tan mampabinyag ed pampabinyagan ko, balet andid limak so pampili no siopay onyurong ed nikawanan tan nikawigik. Onyurong iray angiganaan ed saratan a pasen.”

Nen nadngel ya na saray samploran disipulo, asanukan ira ed kinen Santiago tan si Juan. Tinawag nen Jesus iran amin tan inkuanto, “Kabat yo a saray nipasen a manoley ed saray Hintil walay pakayari rad saray totoon ooleyan da, tan nagawa so labay da ray walay betang. Aliwan onya balet so nepeg a nagawad sikayo. Siopaman ed sikayo so gabay toy mangipangulo, nepeg toy manlingkur ed sikayon amin. Tan siopaman ed sikayo so labay ton manona, nepeg a paaripen ed sikayo. Ta anggan say anak na Too ag linma dian palingkuran, no ag ingen manlingkur tan mangisaklang na bilay to, a panondon ed saray amayamay a totoo.”

Ibanghilyo na Katawan.

28th Sunday in Ordinary Time (B)

ONONAN BABASAEN: Kab. nen S. 7:7-11

Babasaen ya inaon ed libro na Kakabatan nen Solomon

Diad impakabirbir kon sakey ak labat a too, nampikasi ak, et naitdan ak na pakatalus. Sinmabid siak so ispiritu na Kakabatan. Atagey niy impangipasen kod Kakabatan nen say dinanman a trono odino koronay ari. Anggapoy kuintay kayamanan no iparad Kakabatan. Ag makasimbang so kablian na saray alahas ed kablian na Kakabatan; no iyabay ed Kakabatan, amin a balituk ed mundo et singa ra labat sankaakup a buer, tan say pilak et singa labat pitek. Impasen kon mabli ni so Kakabatan nen say abig-laman tan maung ya indengan. Ag balut ombibilonget so karlangan na Kakabatan tan labay ko ni nen saray arum a liwawa. Kaulop na Kakabatan iray amin a maung a bengatla nen sinmabid siak. Inawitan to ak na ag nibalikas a kayamanan.

Sikato yay Salita na Katawan.

Ebat a Salmo

E/. Katawan, pano mo kami pa na panangarom, et mankanta kamid liket.

1. Ibangat mo pad sikami no panoy katikey na bilay mi, et nayarin magmaliw kamin makabat. Katawan, kapigan so itonday pasnuk mo? Kasian mo kami pan aripen mo! E/.

2. Penek mo kami pan kinabwasan na ag mangoman a panangarom, pian mankanta tan manliket kami legay bilay mi. No kaonungay inter mod sikamin ermen, leleg da ra may taon a wala kamid segsegang, ontan pa met so iter mod sikamin liket. E/.

3. Ipanengneng mo pad sikamin aripen mo iray makapanyarin gawgawam; iyabuloy mo komun a nanengneng da ray kabyangay boleg mo so mapagalang a pakayarim. Katawan a Dios mi, bindisionan mo kami pa. Paaligwas mo kami pad amin a gagawaen mi! E/.

KUMADWAN BABASAEN: Heb. 4:12-13

Babasaen ya inaon ed sulat ed saray Hebreo

Mabilay tan mabiskeg so salitay Dios. Matdem nen say anggan anton ispada a nantopag so tarem; talusen to so anggad pansiyanay kamarerwa tan ispiritu, anggad panabetay langolangowan tan otek na pokel. Sintinsiaan to ray kanunotan tan pilalek na saray katoowan. Anggapoy niamut ed Dios. Diad pakanengneng to, lokas tan malinew ya amin iray pinalsa, tan sikato so pangebatan tayod kabibilay tayo.

Sikato yay Salita na Katawan.

Alleluia

E. Alleluia. Say salitam, O Katawan, et katwaan; pasanto mo kami pa diad panamegley na katwaan. E/. Alleluia.

IBANGHILYO Mar. 10:17-30

+ Babasaen ya inaon ed masanton ibanghilyo onung ed kinen Marcos

Nen onaalis lay Jesus, walay sakey a lakin mambabtik a linmad sikato. Tinmalimukor ed arap nen Jesus, insan tinepet to, “Maung a Maistro, antoy nepeg kon gawaen pian nagamuran koy bilay ya andi anggaan?”

Inmebat si Jesus ed sikato, “Akin et tatawagen mo ak na maung? Anggapoy arum a maung no ag say Dios labat. Amtam iray ganggan: ‘Ag ka mamapatey; ag ka mikakaloguran; ag ka mantatakew; ag ka mantitila ed pantasim; ag ka mansasaol; igalang moy amam tan inam.’ ” “Maistro” kuanto may laki, "nanlapud ogaw ak ni, oonuren ko la ra yan amin.”

Maararon ninengneng nen Jesus, tan kuantod sikato, “Wala niy sakey a kakulangan mo. Laka ta ilakom ya amin so kayaryan mo, insan mo iter ed saray mairap-bilay so panlakoan mo. Nawalaan kad satan na kayamanan ed tawen. Insan ka dia ompawil ya ontombuk ed siak.” Nen nadngel na samay laki yan balikas nen Jesus, abaliw so lupa to tan tinmaynan a maermen lapud agaylay inkayaman to.

Ninengneng nen Jesus iray walad kaliber-liber to tan kuantod saray disipulo to, “Mairap a tuloy ya onloob ed Panariay Dios iray mamayaman!”

Nikelawan iray disipulo ed saray balikas to. Inkuanen Jesus lamet, “Anak, talagan mairap so onloob ed Panariay Dios. Mainomay niy kamilyon onloob ed abut na dagom nen say toon mayaman ya onloob ed panariay Dios.”

Nikelawan la ran maung ed saya, kanyan nantetepetan ira, “Siopay nayari a nilaban sirin ey?”
Ninengneng ira nen Jesus tan inmebat, “Ag ya nagawaan na too, balet nagawaan na Dios, ta say Dios nayaryan to a gawaen ya amin iray bengatla.”

Nansalitay Pedro, "Ag mo lilingwanan a tinaynan miy amin a bengatla tan tinmombuk kamid sika."

"On," kuanen Jesus ed sikara, "tan tandaan yo ya: siopamay taynan toy abung, agagi, ina, ama, anak, dalin, lapud siak tan say Maung a Balita, makaawat na maminlasus ed sayan bilay --saray abung, agagi, ina, anak, dalin--balet katekep day pamairap ed sikato. Tan diad biek a bilay makagamur na bilay ya andi-anggaan."

Sikato yay Ibanghilyo na Katawan.

27th Sunday in Ordinary Time (B)

ONONAN BABASAEN Gen. 2:18-24


Babasaen ya inaon ed libro na Genesis

Inkuan na Katawan a Dios, “Aliwan maung a mambukbukor so too. Igawaan ko na sakey a manepeg a kaiba to tan katulongan to.” Kanyan nanmoli na dalin tan sayan minoli to ginawa ton ayayep tan manomanok. Insan to ra inyakar ed samay too, ta nengnengen to no antoy pangingaran tod sikara. No antoy impanawag tod balang sakey, sikatoy ngaran to. Samay too sirin initdan toy kangaranan iray amin a manok tan ayayep; balet anggapod saraya so manepeg a kaiba to tan katulongan to.

Insan say Katawan a Dios pinaogip toy malmalet imay too; nen naogip, angoyus na sakey ed saray taglang to may laki, insan to kinopit so laman ya angalaan to. Ginawa ton bii imay taglang, insan to inyakar ed samay laki. Inkuanto may laki, “A, salamat, sikato yan siansiay kaparak. Pokel ya inalad saray pokel ko, tan laman ya inalad laman ko. ‘Bii' so ngaran to, ta inala ed laki.’ Sikato ya sirin so makasengeg no akin et taynan na laki so ama to tan say ina to tan mikasakey ed asawa to, et magmaliw iran saksakey a laman.

Salita na Katawan.

EBAT A SALMO

E. Bindisionan itayo komun na Katawan legan tayon mambibilay. 

1) Maliket ya amin iray matulok ed Katawan, saray mambibilay ya onung ed saray ganggan to. Pambilay moy bunga na nanlingetan mo; manliket tan onaligwas ka. E.

2) Diad abung mo magmaliw a singa mabungan ubas so asawam, tan magmaliw iray anak mo a singa malangwer iran kiew na oliba diad kaliber-liber na lamisaan mo. E.

3) Andi-duaruwan nabindisionan na onya so toon matulok ed Katawan. Manlapud Sion, bindisionan ka komuy Katawan! Nanengneng mo komuy iyaligwas na Jerusalem legan mon mambilay! E.

4) Andokey komuy bilay mo, pian nanengneng mo ray apom! Manari komun ed Israel so kareenan! E.

KUMADWAN BABASAEN Heb. 2:9-11

Babasaen ya inaon ed sulat ed saray Hebreo

Diad aganon panaon si Jesus apaabeba nen saray anghil, pian diad panamegley na baleg a panangaroy Dios, nepeg ya ompatey para amin a katoowan. Nanenengneng tayo ya akoronaan natan na kagalangan tan dayew lapud asagmak ton kairapan ed impatey to. Manepeg ed Dios – say amalsa tan manaasikasod amin a bengatla – a ginawa toy Jesus a nagnap diad panamegley na kairapan, pian pinabangen tod kagalangan to ray amayamay ya anak. Ta si Jesus so angipanguloy kilalaban da. Lilinisan nen Jesus iray totoo ed saray kasalanan da; sikato a manlinis tan saray nalilinisan et saksakey so Ama ra, kanyan si Jesus ag ambaing a manawag na agagi ed sikara.

Salita na Katawan.

Alleluia

E. Alleluia. Siak so dalan, say katwaan, tan say bilay, kuay Katawan; anggapoy toon makaonlad Ama no ag diad panamegley ko. E. Alleluia.

IBANGHILYO Mar. 10:2-16


Babasaen ya inaon ed masanton ibanghilyo onung ed kinen Marcos

Wala ray Pariseon sinmingger met ed kinen Jesus, ta labay da ya erelen ed salita to. “Ibagam ed sikami,” tinepet da, “iyabuloy kasi na Ganggan ya isian na sakey a laki so asawa to?” “Antoy ingganggan nen Moises ed sikayo?” tinepet nen Jesus ed sikara. Inmebat ira, “Inyabuloy nen Moises a say laki nayarian ton isian so asawa to, kasumpal ton itday kasulatan na pansiyan.” Inkuanen Jesus ed sikara, “Anawet so puso yo, kanyan ingganggan nen Moises so Ontan. Balet nanlapud impamalsay Dios ed mundo nibaga, ‘Pinalsay Dios so laki tan bii. Sikato yay makasengeg a taynan na laki so ama tan ina to tan iyamung toy asawa to, et mankasakey iran dua.’ Kanyan aliwa la ran duara, no ag ta saksakey la ran laman. Ag nepeg sirin a siyanen na too so impankasakey na Dios.”

Nen wala rad abung tinepet na saray disipulo ed kinen Jesus so nipaakar ed saya. Inkuantod sikara, “Say lakin mangisian ed asawa to tan mangasaway sananey mankasalanan ed asawa to, ta mikakaloguran. Mikalugoran met so bin mangisian na asawa to tan miasawad sananey."

Wala ray totoon angawit na ogogaw ed kinen Jesus, ta labay dan diwiten to ra yan ogogaw. Balet nampasnuk iray disipulo ed sarayan totoo. Apasnukay Jesus nen anengneng to yan ginawa da ray disipulo to tan kuantod sikara, "Paolyan yo ray ogogaw ya ondagod siak. Ag yo ra sesebelan, ta saray totoon singa sarayan ogogaw so makankien na Panariay Dios. Tandaan yo ya! Siopamay ag onabuloy a pasakop ed Panariay Dios a singa sakey ya ogaw, ag balut makaloob ed Panariay Dios." Insan to inaampupo ra may ogogaw, intatapew to ray lima tod sikara, tan binibindisionan to ra.

Ibanghilyo na Katawan.

26th Sunday in Ordinary Time (B)

ONONAN BABASAEN Bil. 11:25-29

Babasaen ya inaon ed libro na Saray Bilang

Inmakseb a walad lorem so Katawan tan akisalitad kinen Moises. Angala ed ispiritu ya inter tod kinen Moises tan inter tod sikara. Nen dinmapod sikara so ispiritu, ginapwan day inmeyag a singa saray propita, balet ag nambayag.

Saray duara et saramay pitomplon pangulo, di Eldad tan Medad, et nanayam ira ed dalem na kampo tan ag ira linma ed kawalaan na samay Tulda. Dimad dalem na kampo dinmapod sikara so ispiritu, et ginapwan da met so inmeyag a singa saray propita. Walay sakey a lakin tobun-balon a batik ed kinen Moises tan imbaga tod sikato so gagawaen di Eldad tan Medad.
Insan si Josue a lakin anak nen Nun, tan nanlapud impanbalolaki to et katulongan la nen Moises, nansalita tan kuantod kinen Moises, "Patondam ira!"

Inmebat si Moises, "Nununoten mo so pankaabigan ko? Oy la komun a say Katawan et iter tod amin a totoo to so ispiritu to tan paeyagan to ran amin a singa saray propita!"

Salita na Katawan.

EBAT A SALMO

E. Saray ganggan na Katawan pagagayagaen day puso.

1.) Ayadyari so ganggan na Katawan; papasimbaloen toy biskeg na too. Napanmatalkan iray ganggan na Katawan; mangiiter ira na kakabatan ed saray anggapoy amta. E.

2.) Maung so pangigalang ed Katawan; mansiansia ed anggad angga. Matonung so pananintinsiay Katawan, tan maptek lawas. E.

3.) Iitdan to ak ya aripen mo na kakabatan; natutumangan ak diad pangoonur ko. Anggapoy toon makanengneng na saray dilin lingo to; ipaliis mo ak pa, Katawan, ed saray niamut a kasalanan!. E.

4.) Iyarawi mo ak pa met ed saray ginagalan kasalanan; ag mo pa iyaabuloy ya oleyan da ak. Diad ontan magmaliw ak ya anggapoy pakatetelan, tan akaliktar ak lad kaogsay kasalanan E.

KUMADWAN BABASAEN San. 5:1-6

Babasaen ya inaon ed sulat nen Santiago

Dengel yo ya, sikayon mamayaman! Nangisan tan panogaogan yoy kairapan ya onsabid sikayo! Aboluk la ray kayamanan yo, tan abootan la ray kawes yo. Kinan lay lati iray balituk tan pilak yo, tan satan met a lati mantasin sumpad sikayo tan singa apoy a mangoput na laman yo. Diad sarayan kaonuran ya agew so impanipon yoy kayamanan. Dengel yoy riklamo da ray totoon nankimey ed dalin yo, ta ag yo ra inuupaan. Nadngel na Katawan a Makapanyarin-amin so dageyem da ray omaani yo! Nanlikeliket tan nanggaygayaga kayo diad tapew na dalin. Pinataba yo ray laman yon singa ra ayayep a pateyen ed niganan agew. Sinintinsiaan yon nadusa tan pinatey yo ray totoon matonung; ag ira linmaban ed sikayo.

Salita na Katawan.

Alleluia

E. Alleluia. Ispiritu tan bilay, Katawan, iray salitam; walad sika ray salitan mangiiter na bilay ya andi-anggaan. E. Alleluia.

IBANGHILYO Mar. 9:38-43,45,47-48

Babasaen ya inaon ed masanton ibanghilyo onung ed kinen Marcos

Inkuanen Juan ed kinen Jesus, "Maistro, akanengneng kamiy sakey a toon mamapaekal na saray dimonyo ed ngaran mo. Binano mi, lapud ag kabyangan na olupan tayo."

Balet kuanan Jesus, "Ag yo babanoen, ta anggapoy toon manggaway milagrod ngaran ko, insan pansalitaan to ak a tampol na maoges. Ta say ag onsumpad sikatayo, kaiba tayo. Tandaan yo ya! Siopamay mamainom na danum ed sikayo lapud mananombuk kayo nen Cristo, walay awaten ton awaten a tumang to.

"Magmaung nin bitinay baleg a gilingan so beklew na sakey a too insan ibontuk ed dayat, nen say sikato so pansengegay pankasalanan na sakey ed sarayan ogogaw a manisiad siak. Potut moy limam no sikatoy pansengegay pankasalanan mo. Magmaung nin onloob kad bilay a pokul so sakey a limam nen say duaray limam ya onlad impirno a kawalaay apoy ya ag balut naerep. Potut moy salim so sikatoy pansengegay pankasalanan mo. Magmaung nin onla kad tawen a saksakey so salim, nen say nibantak kad impirnon nantopag so salim. Sokit moy matam no sikatoy pansengegay pankasalanan mo, ta magmaung nin onloob kad Panariay Dios a bulag so sakey a matam nen say nibantak kad impirnon nantopag so matam. Diman, ag ompatey iray bigis a mankibkib ed sikara, tan ag naerep a balut so apoy."

Ibanghilyo na Katawan.
  

25th Sunday in Ordinary Time (B)

ONONAN BABASAEN Kab. nen S. 2:12, 17-20

Babasaen ya inaon ed libro na Kakabatan nen Solomon

Kuan na saray totoon maoges, "Makaskasbel labat iray totoon matonung, kanyan mananap itayoy pankanawnawan mamatey ed sikara. Sumpa rad gagawaen tayo; aakusaen da itayon onsusumlang ed Ganggan nen Moises tan onsusumpad saray kaogaliyan da ray lalaki tayo.

"Balet nengnengen pa no nagawa no oras na ipatey da! No tuan anak na Dios iray matonung, iyagel ira na Dios ed saray kalaban da. Kanyan suboken tayo ra. Magmaliw tayon maruksad sikara, tan pairapen tayo ra; nengnengen pa no panoy kareen da tan inkadugay panagnunot da! Naamtaan tayo so anggaan na inkaanos da! Sintinsiaan tayo ra na makapabaing ya ipapatey. Andi bali, ta kuandan iyagel ira na Dios."

Salita na Katawan.

EBAT A SALMO

E. Say Katawan iyaagel toy bilay ko.

1.) Lapud pakayarim, O Dios, ilaban mo ak pa; lapud biskeg mo, iliktar mo ak pa! Dengel mo pay pikakasik, O Dios; talineng mo pa ray salitak! E.

2.) Nitan la ray malastug a totoon ondogpad siak; labay ak a pateyen na saray maruksan totoo -- totoon ag da ikabkabilangay Dios. E.

3.) Balet say Dios so mananulong ko. Say Katawan so manangyagel ko. Katawan, sililiket ak a mangibagat ed sika; pisalamatan ta ka lapud kamaungan mo. E.

KUMADWAN BABASAEN San. 3:16-4:3

Babasaen ya inaon ed sulat nen Santiago

No iner so kawalaay imon tan pantatalonaan, diman met so kawalaay golo tan amin a klasin kaogsan. Balet say kakabatan a nanlapud Dios et ononaona, malinis. Maaro met ed kareenan, maoyamo, makaaro, mapangasi, makolid panaggaway kaabigan, anggapoy labien to, tan aliwan mansimpisimpitan. Say toon maarod kareenan, diad panaanap toy kareenan, isisibwag toy bokel a mambungay katonungan.

Antoy panlalapway panlalaban tan pankokolkol yo? Ag kasi saray pilalek yon maoges a mansusumpaan ed balang sakey ed sikayo? Wala ray labalabay yo balet et ag yo ra nagamuran, kanyan mamatey ki la; wala ray pampilpilalekan yon nagamuran balet et ag yo ra naala, kanyan mikolkol tan milaban ki la. Ag yo nagagamuran iray labay yo, ta ag yo ra kekekewen ed Dios. Tan no mikerew kayo bilang ag yo naawat, ta maoges iray getma yo; say bengatlan panliketan yon dili so kekerewen yo.

Salita na Katawan.

Alleluia

E. Alleluia. Maliket ka, Ama, Katawan na tawen tan dalin; impaamtam ed saray totoon mapaabeba iray mistirio na panarian. E. Alleluia.

IBANGHILYO Mar. 9:30-37

Babasaen ya inaon ed masanton ibanghilyo onung ed kinen Marcos

Si Jesus tan saray disipulo to tinaynan da man a pasen tan dinmalan irad Galilea. Ag labay nen Jesus a nakabatan na totoo no iner so kawalaan to, lapud ibabangat tod saray disipulo to, "Niawat so Anak na Too ed lima da ray totoon mamatey ed sikato, balet onolid bilay kayariy taloy agew."

Ag atalusan ya na saray disipulo to, balet antakot dan osisaen ed sikato.
Linma rad Capernaum. Nen wala rad loob na abung tinepet nen Jesus ed saray disipulo to, "Anto may pansasangsangan yod dalan?"

Ag ira inmesel, lapud say pansasang-sangan da et no siopay manona ed sikara. Inmirung si Jesus tan tinawag to ray labinduan disipulo, insan kuantod sikara. "Siopamay labay to so walad onaan, mampaonur tan manlingkur ed amin." Tinawag toy sakey ya ogaw tan pinaalagey tod pegley da. Inampupo to tan kuantod saray labinduan disipulo, "Siopamay mangawat ed sakey a singa sayan ogaw lapud siak awaten to ak; tan siopamay mangawat ed siak, aliwan siak labat lay awaten to, no ag ingen pati say angibakid siak."

Ibanghilyo na Katawan.

24th Sunday in Ordinary Time (B)

ONONAN BABASAEN Isa. 50:5-9

Babasaen ya inaon ed libro na propita Isaias

Say Katawan initdan to ak na pakatalus, et ag ak linmaban ed sikato odino inarawian ko. Intaryak so beneg ko ed saray nansiplat ed siak. Ag ko ra binaat nen pinabaingan da ak, nen binagut da ray balbas ko tan nilulukdaan day lupak. Balet ag ak nasakitan na saray panamabaing da lapud tutulongan ak na Katawan a Dios. Pinakapal koy lupak pian nitepel ko ra. Amtak ya ag ak napelag ed kababaingan, lapud asingger so Dios, tan paneknekan ton anggapoy kasalanan ko. Wala kasiy siopaman a makatepel a mangakusa ed siak? No wala, onla kamin dua ed korti, ta iparontal toy pangaakusaan tod siak. Say dilin Katawan a Dios so mangyaagel ed siak---siopa sirin so makapaneknek a siak so nankasalanan? Naandipat ya amin iray mangaakusad siak; naandipat iran singa abel ya inoput na taboney.

Salita na Katawan.

EBAT A SALMO
E. Kaibak so Katawan ed pankurang ko, diad dalin da ray mabilay.

1.) Inarok so Katawan, ta derengelen to ak; derengelen to ray pikakasik. Kapag ontawag ak ed sikato, talinengen to ak. E.

2.) Walad kaliber-liber ko so kaatapan na patey, manasingger ed siak so patit na lobuk; napno ak na takot tan paga. Insan tinmawag ak ed Katawan, "Pikasik ed sika, Katawan, ilaban mo ak pa!". E.

3.) Mapangasi tan matonung so Katawan; maabagey so Dios tayo. Say katawan iyaagel to ray pakaskasi; nen wala ak ed kaatapan, inlaban to ak. E.

4.) Say Katawan impaliis to ak ed patey; pinatonda toy panagagos na luak, tan ag to inyabuloy a natalo ak. E.

KUMADWAN BABASAEN San. 2:14-18

Babasaen ya inaon ed sulat nen Santiago

Agagik, antoy nagunggonay toon mangibagan walay pananisia to, balet et ag papaneknekan na saray gawgawa to? Nilaban kasi na onyan pananisia? Bilbilang: wala ray agagin bibii o lalaki ya anggapoy nipales tan anggapoy nakan da.

No say sakey ed sikayo ikuantod sikara, "Bindisionan kayo komy Dios! Napetangan tan makapangan kayo komun a maung!" balet et ag to ra itday nakaukolan da, wala kasiy nagunggona rad satan? Ontan met, inatey so pananisian anggapoy katekep to ran gawa.

Balet walay mangikuan, "Walay pananisiam, balet wala ray gawak." Ebat to met balet, "Ipanengneng mod siak so pananisiam ya anggapoy katekep to ran gawa, tan ipanengneng kod sikay pananisiak diad panamegley da ray gawak."

Salita na Katawan.

Alleluia
E. Alleluia. Lokasan mo pay kapusoan mi, O Katawan, pian narengel mi ray salita na Anak mo. E. Alleluia.

IBANGHILYO Mar. 8:27-35

Babasaen ya inaon ed masanton ibanghilyo onung ed kinen Marcos

Linmay Jesus a kaolup to ray disipulo to ed saray bario na Cesarea na Filipos. Nen wala rad dalan tinepet tod sikara, "Siopa ak, onung na ibabagay totoo?"

Inmebat irad sikato, "Wala ray mangibabagan sika si Juan a Managbinyag. Ibabagay arum a sika si Elias; wala met iray mangibabagan sakey ka ed saray propita."

"Sikayo balet, antoy kuanyo? Siopa ak?" tepet tod sikara.

"Sika so Cristo," ebat nen Pedro.

Insan to ra binilin, "Ag yo ibabagad siopaman no siopa ak."

Nanlapud saman, impakabat nen Jesus ed saray disipulo to a say Anak na Too et nepeg a manirap a maung; ag awaten na saray mamatakken na baley, saray manonan papari, tan saray iskriba; papatey da ni, balet onolid bilay kasumpal na taloy agew. Malinlinew so impangibaga to ya ed sikara, kanyan si Pedro inyarawi toy daiset si Jesus tan nansalitaan to. Balet imbeneg nen Jesus tan inarap to ray disipulo, insan to nampasnukay Pedro. Inkuanto, "Arawi kad siak, Satanas! Say labay na too so nununoten mo, aliwan say labay na Dios."

Pinaasingger natan nen Jesus iray totoo tan saray disipulo to. Inkuanto, "Siopamay malabay ya ontombuk ed siak, nakaukolan a lingwanan toy sikaton dili, sakbaten toy krus to, insan ontombuk ed siak. Ta naandiay bilay so toon mangilaban na bilay to; balet nilaban so toon mangiter na bilay to makasengeg ed siak tan say Maung a Balita."

Ibanghilyo na Katawan.

Balon design.

Asalatan so lupa na blog tayo. No labay yo so man-comment, odino basaen so comments na arum, just click the numero/number ya kaabay na samay word "Comments" ya naalmo diad leksab na title na postings. salamat.

Bali-balin response!

Bali-bali so response ed say "Panmutektekan Tayo so Salita'y Dios"! Salamat ed sikayon amin! Itultoloy tayo ya ta baleg so tulong to ray comments tan reflections diad say panmumutektek tayo na Salita'y Dios para say homily tayo! Niduma-duma manaya no dakel so mikabiangan ya manmutektek. Duga may suggestion nen frmaning: nakaukolan ya imbitaan ni ray arum!

Samay readings ya ontumbok a Simba so aka-post la. Kanian, "Let's get ready to rummmble!" What I mean is, you know,  let's start reflecting! he heheh

23rd Sunday in Ordinary Time (B)

23rd Sunday in Ordinary Time

ONONAN BABASAEN Isa. 35:4-7

Babasaen ya inaon ed libro na propita Isaias


Ibaga yod balang sakey a toon nakalay biskeg na linawa, “Mampabiskeg kayo tan ag kayo natatakot! Onsasabiy Dios a mangyagel ed sikayo; onsasabin manusad saray kalaban yo.”

Diad satan, makanengneng iray bulag, tan makadngel iray telek. Manlukson singa ulsa iray piley, tan mankantad liket iray emel. Onagos iray kolus ed kalawakan; magmaliw ya ilog so makasinit a kabueran, tan nawalaan na saray sobul so amaga-magan dalin.

Salita na Katawan.

EBAT A SALMO

E. Idayew moy Katawan, O kamarerwak!

1.) Say Dios nen Jacob kikilingan tod panagsintinsia to iray mairap-bilay, tan iitdan toy nakan iray narasan. E.

2.) Say katawan iitdan toy pakanengneng iray bulag. Itatanduro to ray atumba; aaroen to ray matonung a totoo to. Iyaagel to ray sangkailin manaayam ed bansa tayo. E.

3.) Tutulongan to ray balo tan saray olila, balet iyaakar to ray totoon maoges ed kaderalan da. Say Katawan et ari ya anggad angga. Say Dios mo, O Sion, manoley ed amiy panaon. E.

KUMADWAN BABASAEN San. 2:1-5

Babasaen ya inaon ed sulat nen Santiago

Agagik, bangta mananisia kayod Katawan tin Jesu-Cristo, say mapagalang a Katawan, ag yo nepeg a labien iray arum a totoo. Bilbilang: linmoob ed tipon yo so toon mayaman ya akasingsing na balituk tan akakawes na mabmabli, insan linmoob met so toon mairap-bilay ya apilatpilat so kawes to. No asikasoen yo may mabmabliy kawes to tan kuanyo: “Yorung ki diad sankamaungan a yorungan,” balet kuanyod samay mairap-bilay, “Alagey ka lad tan, o yorung kad mad sokung,” wala lay lalabien yod satan, tan nagmaliw kayon managsintinsia a wala ray maoges a kanunotan.

Dengel kayo, inararok iran agagi! Ag ta say Dios pinili to ray mairap-bilay ed tapew na dalin ya onyaman ed pananisia tan manawir ed Panarian ya insipan tod saray mangaarod sikato?
Salita na Katawan.

Alleluia

E. Alleluia. No inaro ak na siopaman, onuren to ray salitak; aroen na Amak tan onla kamin manayam ed sikato. E. Alleluia.

IBANGHILYO Mar. 7:31-37

Babasaen ya inaon ed masanton ibanghilyo onung ed kinen Marcos

Diad impawil nen Jesus ed Dayat na Galilea a nanlapud lugar na Tiro, dinmalan ed Sidon tan Decapolis. Inyasingger na pigaran totoo ed kinen Jesus so sakey a toon telek tan ataata, tan akikasi rad sikato ya itapew toy lima tod saman a laki. Inyarawi nen Jesus ed karaklan imay laki. Nen siksikara lan dua, inseksek to ray tamoro tod saray layag to may telek. Insan linmukda tan diniwit toy dila na laki . Tinmangay si Jesus ed tawen, inmingas na araldalem, tan inkuanto, “Ephphatha,” a kabaliksan toy “Lokas ka!”

Akadngel a tampol, nakal so panaataata to, tan akapansalitay maptek. Binilin nen Jesus iray totoon ag da ya totongtongen ed siopaman, balet no panaoy impangisebel to ed sikara, diman linmoor so impangibawag da. Ontan lay pankelaw da ray akadngel ed sayan balita tan inkuanda, “Agaylay abig na amin a gagawaen to! Iitdan toy pakadngel iray telek, tan pakasalita iray emel!”

Ibanghilyo na Katawan.

22nd Sunday in Ordinary Time (B)

22nd Sunday in Ordinary Time

ONONAN BABASAEN Deut. 4:1-2, 6-8

Babasaen ya inaon ed libro na Deuteronomio

Inkuanen Moises ed saray totoo, “Onur yo ray amin a ganggan ya ibabangat kod sikayo, et mansiansia kayon mambilay tan sakopen yo so dalin ya iter ed sikayo na Katawan a Dios na saray lalaki yo. Ag yo aaruman so igaganggan kod sikayo, tan ag yo babawasan. Onur yo ray ganggan na Katawan a Dios yo, saray ganggan ya inter kod sikayo.

“Pampelengan yo ran onuren, ta sikatoy pakabirbiran na saray totood saray arum a bansa a makabat kayo. No narengelan da ra yan amin a ganggan ikuanda, ‘Agaylay kakabatan tan pakatalus na saray totood sayan makapanyarin bansa!’

“Anggapoy arum a bansa, anggan anto lay pakapanyari to, ya asingsingger ed sikato so dios to no nakaukolan to, a singa kinaasingger ed sikato na Katawan a Dios tayo. Eebatan to itayo kapag onkerew tayoy tulong to.”

Salita na Katawan.

EBAT A SALMO

E. Mambilay ed arap na Katawan so toon kamaungan so gagawaen to.

1. Say toon oonuren toy Dios, tan kamaungan lawas so gagawaen to, tua tan napanmatalkan iray salita to, tan ag to papaogesey kapara ton too. E.

2. Ag manggagaway maoges ed saray kakaaro to, tan ag mangikakayat na tila nipaakar ed kapara ton too. Babalawen to ray totoon ipopolisay na Dios, balet gagalangen to ray mangoonur ed Katawan. E.

3. Mampapautang ya anggapoy abang tan ag napasoksokan a mantasi sumpad toon anggapoy kasalanan. Siopamay toon manusumpal ed sarayan amin et maligen lawas so bilay to. E.

KUMADWAN BABASAEN San. 1:17-18,

21-22, 27

Babasaen ya inaon ed sulat nen Santiago

Nanlapud tawen so balang maung tan nagnap a langkap; nanlapud Ama ya amalsad amin a liwawa. Sikatoy ag mangoman tan ag met panlapway bilonget diad ibeneg to. Onung ed linawa to, initdan to itayoy bilay diad panamegley na tuan salita, pian walay kanepegan tayon magmaliw a sankatalonggaringan ed amin da ray pinalsa to.

Suko kayod Dios tan awat yoy salitan intanem tod puso yo, ta sayan salita so makapangilaban ed sikayo.

Toluk kayod salitay Dios. No dengelen yo labat ya ag yo onuren, titilaan yoy sikayon dili.

Say relihion a malinis tan manepenepeg ed arap na Dios tan Ama tayo, saya: say pangasikaso tan panulong ed kairapan na saray olilan sigput tan saray balon bibii, tan say pangasikaso na sikan dili, pian ag ka narotakay kaogsan ed sayan mundo.

Salita na Katawan.

Alleluia

E. Alleluia. Siak so silew na sankamudoan, kuay Katawan; say ontombuk ed siak niwalad sikatoy silew a mangiiter na bilay ya andi-angaan. E. Alleluia.

IBANGHILYO Mar. 7:1-8, 14-15, 21-23

Babasaen ya inaon ed masanton ibanghilyo onung ed kinen Marcos

Nantitipon ed kawalaan nen Jesus iray Pariseo tan pigaran iskriba a nanlapud Jerusalem. Naimano ra a pigarad saray disipulo to so mangakan a marotak so lima ra, lapud ag ira nanoras onung ed kaogaliyan na saray Judio.

Ta amin da ray Judio, lautlad saray Pariseo, et ag ira mangan no ag ni ra nanoras na lima ra, onung ed kaogaliyan ya impabangon na saray lalaki ra. No manlapu rad tindaan, ag ira mangan na antokaman no ag da ni naorasan. Dakdakel ni so abangonan dan bangat na lalaki ra, a singa say panagoras na saray losur, boyug, gansan yaung, tan dokulan.

Kanyan tinepet na saray Pariseo tan saray iskriba ed kinen Jesus, “Akin et ag oonuren na saray disipulom so bangat ya impabangon da ray lalaki tayo, ta mangakan iran ag ni nanoras na lima ra?”

Inmebat si Jesus ed sikara, “Duga so imbaga nen Isaias nipaakar ed sikayo. Mansimpisimpitan kayo, onung na insulat to: ‘Inkuay Dios – Gagalangen ak na sarayan totoo diad panamegley na bibil da; balet diad tuay tua, arawrawid siak so puso ra. Kanyan say pangidadayew dad siak anggapoy kana, ta anggan saray ganggay too gagawaen dan ganggay Dios ira!’”

Insan kuanen Jesus, “Palpaolyan yoy ganggan na Dios, oonuren yo balet so tinawir yo ran bangat na too.”

Pinaasingger lamet nen Jesus iray totoo tan inkuantod sikara, “Dengel kayon amin tan talusan yoy ibagak. Aliwan say onloob no ag ingen say ompaway ed too so mandotak ed sikato.

“Ta manlapud otel na pusoy too iray maoges a kanunotan, pilalawanan, panagtakew, panagpatey, pikakaloguran, panagagom, tan amin iray kaogsan a singa panagsaol, panaggaway karumsisan, panagimon, panagpaoges ed kaparan too, panagpaatagey na linawa, kaambagelan. Diad pusoy too so panlalapwan da ra yan amin, tan sikaray mandotak ed sikato.”

Ibanghilyo na Katawan.

Welcome ed blog tayo!

Sayan blog et para sikatayo ran papari na arkidiosis na Lingayen-Dagupan, tan arum niran interesado ed Salita'y Dios. Wala yan bengatlan blog pian naitdan tayo na pankanawnawan manmutektek ed say ibanghilyo na arapen a simba. Diad saya, makapansasakey tayo ya manmutektek, tan makapan-bokel na sakey ya homily para say parokyano tayo.

Sirin, onya so gawaen tayo:

1. I-post ko la so babasaen ed arapen a simba kada Lunes.
2. Lukas para amin ya mangitilak ya comments. Anto ra so comments? Saray nanduroman relfections yo odino anggan antokaman ya walad puso tan kanunutan nipaakar ed saray babasaen.
3. Walad balang sakey la ed sikatayo ya makabokel na homily sirin unong ed saray mararakep, bali-bali tan masansanting ya comments yo ed saray readings.

Panon so man-comment?

1. Tolnek so salitan "comments" ya naalmo ed leksab na samay aka-post ya babasaen ed misa. Walay ompaway ya kahon "Post a Comment".
2. Isulat so antokaman ya reflections tan comments dimad kahon ya "Leave your Comment".
3. No anggapo so account ed Google, pilien la so "anonymous" diad "identity" box..
4. Tolnek so "Publish your comment"
5. Ayos la! Nabasa lan amin na karaklan so comments ya insulat.
6. Isulat so ngaran pian amta no siopa so nan-comment. Anggan maminpiga, sarag to so man-comment.
7. Kanian, asikasoen so isulat. No walay makapoy ya naisulat, saya so na-delete.

Panon ya basaen so comments na arum:

1. Tolnek labat so salitan "comments". Naneng-neng met no pigara la so nan-comment.