ONONAN BABASAEN Neh. 8:2-4,5-6,8-10
Babasaen ya inaon ed libro na propita Nehemias
Inala nen Esdras so libro na Ganggan, insan to inyakar ed nantitiponan na saray totoo-lalaki, bibii, tan ogogaw a nayarian da lay ontalus. Diad saman a plasa ed abay na puirta imbasa tod sikaray Ganggan manlapud palbangon ya anggad kaagwan, et marengerengel iray totoo.
Si Esdras nanalagey ed tapew na intabladon tabla ya impaalagey makasengeg ed saman ya agawa.
Atagey so panalalageyan nen Esdras, kanyan sankanengneng na amin a totoo. Ag da inyalis so mata rad sikato et kapangilokas tod libro inmalagey ya amin. Inkuanen Esdras, "Nadayew komun so Katawan, say matalonggaring a Dios!"
Amin a totoo inyatagey day lima ra tan kuanda, "Amen, Amen!" Insan ira dinmakmomon angigalang ya anggad dalin.
Impatalus dad salitan ikakana na saray totoo so Ganggan na Dios, insan da impaliwawa pian natalusan na saray totoo.
Saray mangipapaliwawa na Ganggan a di Nehemias a gobirnador, Esdras a pari tan iskriba, tan saray Levita, et inkuanda sirin ed amin a totoo, "Masanto yan agew ed Katawan a Dios yo, kanyan ag kayo nepeg a manermen odino onakis. Sempet ki la ta mampista kayo. Iyapag yod saray kulang so paraan iray kakanen tan alak yo. Masanto yan agew ed Katawan tayo, kanyan ag kayo maneermen. Pabiskegen kayo na liket ya iter ed sikayo na Katawan."
Salita na Katawan.
Ebat a Salmo
E. Ispiritu tan bilay, Katawan, iray salitam.
1. Ayadyari so ganggan na Katawan; papasimbaloen toy biskeg na too. Napanmatalkan iray ganggan na Katawan; mangiiter ira na kakabatan ed saray anggapoy amta. E.
2. Maptek iray ganggan na Katawan, tan pagagayagaen day puso. Matonung iray ganggan to, tan liliwawaan day pakatalus. E.
3. Maung so pangigalang ed Katawan; mansiansia ed anggad angga. Matonung so pananintinsiay Katawan, tan maptek lawas. E.
4. Makapaliket komun ed sika iray salitak tan saray kanunotan ko, O Katawan a salimbengan ko tan mananondon ko! E.
KUMADWAN BABASAEN 1 Cor. 12:12-30
Babasaen ya inaon ed ononan sulat nen Pablo ed saray taga Corinto
Si Cristo et singa sakey a laman ya amayamay so kabyangan to; anggaman a titibokeley nandoroman kabyangan, saksakey ni lamlamang yan laman. Ontan met ya amin tayo, Judio man o Hintil, aripen man o andi, bininyagan itayo na saksakey ya Ispiritu, tan nagmaliw itayon sakey a laman. Pinainom itayo met ya amin ed saksakey ya Ispiritu.
Ta say dilin laman et titibokeley amayamay a kabyangan, aliwan saksakey labat. No ibagay sali, "Aliwa ak a lima, kanyan aliwa ak a kabyangay laman" ag to kabaliksan ya aliwa lan kabyangay laman. No ibagay layag, "Aliwa ak a mata, kanyan aliwa ak a kabyangay laman," ag to kabaliksan ya aliwa lan kabyangay laman. No say intiron laman et mata labat, panoy pakadngel to? Tan no layag labat, panoy pakaangub to? Balet, onung ed labay na Dios, impasen tod laman iray nandoroman kabyangan. Anggapoy laman no saksakey so kabyangan to! Say katwaan to, amayamay so kabyangan balet saksakey so laman.
Kanyan sirin, ag nibaga na mata ed lima, "Ag ta ka nakaukolan!" Ag met nibaga na olo ed saray sali, "Ag ta kayo nakaukolan." Say katwaan to, saray singa anggapoy kanan kabyagay laman et sikara la laingey nakaukolan. Papagalangan tin maung iray kabyangay laman a nababaloan tayon andiay kagalangan. Paparakepen ti ray kabyangan a aliwliway nengneng da. Ag nakaukolan a gawaen tayo ya ed saray marakep a kabyangay laman. Nen inoksuy na Dios so laman tayo, pinagalangan to ray kabyangan a kulang so kagalangan da, pian anggapoy pansisian da ray kabyangay laman, no ag ingen manmamasakitan ira. No apasakitay sakey a kabyangan, nalikna ran amin. No apagalangay sakey a kabyangan, naliketan iran amin.
Amin yo sirin et saksakey a laman nen Cristo, tan balang sakey et kabyangan to. Impasen na Dios ed iglisia, onona, saray apostol; onkumadwa, saray propita; onkumatlo, saray bumabangat. Insan impasen to ray managgawa na milagro, saray walay pakayarin mamaabig na mansasakit, saray mananulong, saray inkargado na kimey, tan saray managsalitay nandoroman salita. Aliwan amin da et apostol, o propita, o bumabangat. Ag ira naitdan ya amin na pakayarin manggaway milagro, o mamaabig na mansasakit, o mansalitay nandoroman salita, odino mangipatalus ed sarayan salita.
Salita na Katawan.
Alleluia
E. Alleluia. Imbaki ak na Katawan a mangipulong na Maung a Balita ed saray mairap-bilay, tan kawayangan ed saray priso. E. Alleluia.
Ibanghilyo Luc. 1:1-4;4:14-21
+Say gapo na masanton ibanghilyo onung ed kinen Lucas
Amayamay la ray nanoksuy tan nansulat nipaakar ed saray bengatlan agawgawad pegley mi. Insulat da ray imbabalitad sikami na saray akakkaimatun nanlapud gapo ed sarayan agawgawa tan nampupulong na salitay Dios. Kasumpal kon inaral a maung yan agawgawa nanlapud inggapo ra, ninunot kon maabig ya isulat ko ran maoksuy para sika. Gawaen ko ya sirin, pian naamtaan moy katwaan da ray imbabangat dad sika.
Pinmawil ed Galilea si Jesus, tan walad sikatoy pakayari na Ispiritu Santo. Kinmayat ed amin a kaliber-liber a pasen so balitan nipaakar ed sikato. Nambabangat ed sinagoga ra, tan indadayew na amin a totoo.
Sinmempet si Jess ed Nazaret, say baley a binalegan to. Onung na kaogaliyan to, linmoob ed sinagoga nen Agew na Panagpainawa. Inmalagey a mambasay Masanton Sulat, tan say libro nen propita Isaias so inter dan basaen to. Binuskag tod pasen ya onyay akasulat: "Walad siak so Ispiritu na Katawan, ta pinili to ak a mampulong na Maung a Balita ed saray mairap-bilay. Imbaki to ak a mangibalitad saray apriso a nabolus la ra, tan saray bulag a makanengneng la ra. Imbaki to ak met a mangibalitad saray napapairap a nainawaan la ra, tan mangipakabat na manepeg a taon a pangilabay Katawan."
Nilokut nen Jesus imay nambasaan to, insan to inderew ed samay manlilingkur ed sinagoga. Inmirung, tan sankanengneng na amin a totoo. Inkuantod sikara, "Asumpal ed sayan agew so ibabaga to yan parti na Masanton Sulat a nadngel yo."
Ibanghilyo na Katawan.