Oratio Imperata

To be prayed after the Post Communion Prayer (before the Final Blessing) in all Masses from March 1 to May 15, 2010)

Lord God the creator of all things
Your Spirit moved over the face of the waters at the dawn of creation
You gather the seas into their places and direct the courses of the rivers
We praise you for the gift of water
Now our land is dry and barren, thirsting for life-giving rain
Send rain upon the earth so that it will bring forth life
May we use only the water we each need
And let us take care of and give encouragement to
All those whose livelihood depend on the produce of the land.

After every invocation please say: We beseech you hear us.

Jesus, Our Lord
We beseech you hear us
Jesus our Lord, protect all tillers of the oil
We beseech you, hear us
Jesus our Lord, bring to all a true knowledge of the stewardship of the land
We beseech you hear us
Jesus our Lord, preserve and increase our fields and flocks. We beseech you hear us
Jesus our Lord, bless our fields We beseech you hear us
San Isidro, pray for us.

Let us Pray

Sustaining God, we receive the fruits of the earth from your generous hand, yet now we observe the eager earth frustrated by lack of rain.

Have mercy Almighty God on our parched land.
Bring peace to our worried minds and soothe our anxious hearts now and forever.

Amen

The Pangasinan Translation

Katawan min Dios, Manamalsay amin ya ganagana
Linmaknab so Ispiritu Yo ed tapew na danum nen kagapoy panamalsa
Tinipon Yo ray dayat diad saray pasen da tan inturo Yoy panagosan na saray ilog.
Idadayew mi Kayo ed say langkap Yod sikamin danum.
Natan namamagaan tan aliwa lan mabona so dalin min napapaet ed say napanbilayan ya oran.

Ibaki Yo pay oran ed mundo pian sikatoy makapangiter na bilay.
Oy la kumon ta say nakaukolan mi labat lan danum so usaren mi
Tan naasikaso mi kumon tan napabiskeg mi linawa da ray
Amin ya say panbibilay da et maniilalo labat lad saray bunga na dalin.

Kada kasumpal na pikakasi, say ebat: Talineng Yo kami.

Jesus, a Katawan mi
Talineng Yo kami
Jesus, a Katawan mi, ilaban Yo pa ray amin ya dumaralos na dalin
Talineng Yo kami
Jesus, a Katawan mi, iter Yod amin so tuan kakabatan na nipaakar ed say panangasikaso na dalin
Talineng Yo kami
Jesus a Katawan mi, iyagel tan pabolaslas Yo pa ray kaomaan tan ayayep mi.
Talineng Yo kami
Jesus a Katawan mi, bendision Yo pa ray kaomaan mi.
Talineng Yo kami
San Isidro, pikasi yo kami.

Mikasi tayo

Dios a managlegpet, nanaawat mi ray bunga-bunga na dalin ya manlalapud mabunlok ya lima Yo, balet natan, nanaimatonan mi so mapilalek ya dalin a nalelepes lapud say kakulangan na oran.

Mangasi Kayo, O Matalonggaring ya Dios, ed saray dalin min namamagaan.
Itdan Yo pay kareenan so nagogonigon ya kanunotan mi, tan tambayoen Yo pa ray mapagan kapusoan mi, natan tan diad ando lan ando.

Amen.

1st Sunday of Lent ( C )

ONONAN BABASAEN Deut. 26:4-10

Babasaen ya inaon ed libro na Deuteronomio

Inkuanen Moises ed saray totoo:

“Samay pari alaen to may baskit ed sikayo insan to igaton ed arap na altar na Katawan a Dios yo. Insan diad arap na Katawan ibitla yo ra yan salita: ‘Say lakik et sakey ya akar-akar ya Arameo, ya inawit ton nanayam ed Egipto so pamilya to. Nen linma rad Egipto dagdaiset ira, balet nagmaliw iran baleg tan makapanyarin bansa. Pinairap kami na saray Egipsio tan pinasoot da kamin nankimey ta aripen da kami. Insan kinmerew kami na tulong ed Katawan a Dios na saray lalaki mi. Nadngel to kami tan anengneng toy irap mi, segsegang mi, tan say pangaskasiyan a kipapasen mi. Diad panamegley na baleg a pakayari tan biskeg to inyagel to kamid Egipto. Nanggagawa na saray milagro tan pakelaw, tan saray makapataktakot a bengatla. Inyakar to kami dia tan inter tod sikami yan mayaman tan mataban dalin. Kanyan natan iyakar kod Katawan so sayan ononan naani ya inter to siak.

Salita na Katawan.

Ebat a Salmo

E. IBAAN MO AK PA, KATAWAN, NO WALA AK ED GUNIGON.

1. Siopamay onlan onsalimbeng ed Katawan, siopamay mansiansiad silong na panangyagel na Makapanyarin-amin, nayarian ton ibagad Katawan, “Sikay salimbeng tan mananyagel ko! Sikay Dios ko, sika so panmamatalekan ko.” E.

2. Anggapoy maoges a nagawad sika, tan anggapoy inkaruksan nagawad abay na abung mo. Iganggan na Dios iray anghil ton mangasikasod sika, tan mangyagel ed sikad inerman a laen mo. E.

3. Ampayaen da kad lima ra, pian diad bato anggan saray salim ag mo ra nitopa. Gatinan mo ray lion tan saray oleg, saray masesebeg a lion tan saray nanditan oleg. E.

4. Kuay Dios, “Ilaban ko ray mangaarod siak, tan iyagel ko ray mamibirbir ed siak a Katawan. No ontawag irad siak ebatan ko ra; no wala rad gunigon ibaan ko ra. Iyagel tan pagalangan ko ra.” E.

KUMADWAN BABASAEN Rom. 10:8-13

Babasaen ya inaon ed sulat nen Pablo ed saray taga Roma

Saya so ibabagay Masanton Sulat,

“Asingger ed sikay salita, walad saray bibil mo tan dalem na pusom” – salanti, say salitan ipupulong min nipaakar ed pananisia. No ibawag mo diad panamegley na sangim a si Jesus et Katawan tan manisia kad pusom a sikatoy pinaoli na Dios ed bilay, nilaban ka. Ta diad panisiay too ed panamegley na puso to, napaandi so kasalanan tod arap na Dios tan diad pangibawag na too ed panamegley na sangi to, nilaban. Ta ibabagay Masanton sulat, “Siopamay manisiad sikato, ag nabaingan.” Anggapoy pandomaay Judio tan Grigo, ta say Katawan et Katawan na amin, tan mangiiter na dakel a bindision ed amin da ray ontatawag ed sikato. Onung na ibabagay Masanton Sulat, “Siopamay ontawag ed ngaray Katawan, nilaban.”

Salita na Katawan.

Birsikulo Kasakbayay Ibanghilyo Mat. 4:4

Aliwa labat a tinapay so pambilay na too, no ag pati amin a salitan ibabalikas na Dios.

Ibanghilyo Luc. 4: 1-13

+Babasaen ya inaon ed masanton ibanghilyo onung ed kinen Lucas
Sinmiput si Jesus ed Jordan a napnoy Ispiritu Santo, tan inyakar ed kalawakan na Ispiritu. Tinutuksod man na Diablo ed loob na apataploy agew. Ag angan a balut legan to yan panaon kanyan kasumpal to, narasan a maung.

Inkuay Diablo ed sikato, “No sikan talagay Anak na Dios, iganggan mod sayan bato a magmaliw a tinapay.”

Inmebat si Jesus, “Ibabagay Masanton Sulat, ‘Aliwa labat a tinapay so pambilay na too!’”

Insan inyakar na Diablo ed atagtagey a pasen tan diad sakey a bekta, impanengneng tod sikatoy amin a nanarian ed intiron mundo. “Iter kod sikay amin a pakayari tan kayamanan na sarayan nanarian,” inkuay Diablo. “Tan nipalima yan amin ed siak, tan nayarian kon iter ed siopaman a labay ko. Kanyan no ondakmomo ka tan mangigalang kad siak., kien mo la ra yan amin.”

Inmebat si Jesus, “Ibabagay Masanton Sulat, ‘Igalang moy Katawan a Dios mo, tan sikato labat so panlingkuran mo!’”

Inyakar na Diablo si Jesus ed toktok na Timplod Jerusalem tan inkuanto, “No sikan tuay Anak na Dios, tabuy ka! Ta ibabagay Masanton Sulat, ‘Iganggan na Dios iray anghil ton mangasikasod sika’; tan ‘Ampayaen da kad saray lima ra, pian diad bato anggan saray salim ag mo nitopa.’”

Balet inkuanen Jesus, “Ibabaga met na Masanton Sulat, ‘Ag mo tutuksoen so Katawan a Dios mo!’”

Kasumpal na Diablo a ginaway anggaay nayarian to a manuksod kinen Jesus, linma la tan nanalagar na pankanawnawan panukso to lamet.

Ibanghilyo na Katawan.

6th Sunday in Ordinary Time ( C )

ONONAN BABASAEN Jer. 17:5-8

Babasaen ya inaon ed libro na propita Jeremias

Say Katawan kuanto, “Dusaen koy toon onarawid siak, tan manmatalek ed too, tan diad biskeg na saray ompatey a totoo. Sikatoy singa abeban kiew ed kabueran—ya ontutubod andi-kakanaan ya amagan dalin, diad maasin ya dalin ya anggapoy tanaman a mabilay; anggapoy antokaman a maabig a nagawad sikato. Balet bindisionan koy toon mamatalek tan manisiad siak. Sikatoy singa kiew a nitanem ed abay na kolus tan ipapasabi tod danum iray lamut to. Ag antakot no onsabiy tiagew, ta mansiansian birdi ray bolung to; anggapoy pagpaga to no ag onoran; ag ontonda a mambunga.”

Salita na Katawan.

Ebat a Salmo

E/. MALIKET IRAY MANMAMATALEK ED KATAWAN.

1. Maliket so toon ag ontotombuk ed simbawa da ray totoon maoges, ag to aaligey kagagawa da ray totoon makasalanan, tan ag mikakasakey ed saray totoon managbalaw na kamaungan. Ingen,maliket a mangoonur na Ganggan na Katawan, tan agew-labi ton dadaleplepen. E/.

2. Aliling toy kiew a nitanem ed abay na managos a danum; mambubunga no panaon to tan ag namamagaan iray bolung to. Onaaligwas iray amin a gagawaen to. E/.

3. Balet aliwan onyay toon maoges, singa taep ya ititikyab na dagem. Say Katawan iwawanwan tan iyaagel to so toon matonung, balet nabalang ya anggad angga so toon maoges. E/.

KUMADWAN BABASAEN 1 Cor. 15:12, 16-20

Babasaen ya inaon ed ononan sulat nen Pablo ed saray taga Corinto

Natan ta ipupulong min naolid bilay si Cristo, akin et saray arum ed sikayo ibabaga ran ag naolid bilay iray inaatey? No ag naolid bilay iray inaatey, ag met sirin naolid bilay si Cristo. No ag naolid bilay si Cristo, anggapoy kakanaay pananisia yo tan ag kayo ni naokpus ed saray kasalanan yo. Aliwa nin satan labat, ompaway ya amin da ray inaatey a mananisiad Cristo et abalang ira. No say ilalo tayod Cristo et diad sayan bilay labat, sikatayo lay pangaskasiyan ed amin a katoowan.

Balet say katwaan et naolid bilay si Cristo a pamaneknek a naolid bilay iray inaatey.

Salita na Katawan.

Alleluia
E. Alleluia. Lokasan mo pay kapusoan mi, O Katawan, pian narengel mi ray salita na Anak mo. E. Alleluia.

Ibanghilyo Luc. 6:17, 20-26

+Babasaen ya inaon ed masanton ibanghilyo onung ed kinen Lucas

Kaleksab da, immalagey si Jesus ed nipatar a pasen. Dakerakel met iray wadman a disipulo to, tan amayamay a totoon nanlapud intiron Judea tan Jerusalem, tan saray pasen ed gilig na dayat a nasasakopay Tiro tan Sidon.
Ninengneng nen Jesus iray disipulo to tan inkuanto:

“Maliket kayon mairap-bilay, ta kayarian yoy Panarian na Dios!

“Maliket kayon narasan natan, ta napesel kayo! Maliket kayon mannangis natan, ta napaliket kayo!

“Maliket kayo no bosul-bosulen, ipolpolisay, pabpabaingan, tan pagpaogesen da kayo, lapud Anak na Too! Manggayaga kayo tan lukso kayod liket no nagawa ya, ta balbaleg so tumang yod tawen. Onya met so ginagawa na saray lalaki ra ed saray propita.

“Pakaskasi kila, sikayon mamayaman, ta naawat yo lay ligliwa yo!

“Pakaskasi kila, sikayon napepesel natan, ta naerasan kayo!

“Pakaskasi kila, sikayon maneelek natan, ta onermen tan onakis kayo!

“Pakaskasi kila no daydayewen kayoy amin a totoo, ta onyay ginagawa na saray lalaki ra ed saray tila-tilan propita.”

 

Ibanghilyo na Katawan.

5th Sunday in Ordinary Time (C)

ONONAN BABASAEN Isa. 6:1-2,3-8

Babasaen ya inaon ed libro na propita Isaias

Diad samay taon ya inatey si Ari Uzias anengneng koy Katawan. Manyodyorung ed trono tan atagey tan mapagalang, tan nilaknaban na kawes to so intiron Timplo. Manalalagey ed kaliber-liber to iray sirapin. Mantatawagan ira: "Masanto, masanto, masanto! Masanto so Katawan a Makapanyarin-amin! Say sankamundoan napno na kagalangan to."

Niyegyeg na saray bosis da so pundasion na Timplo, tan napno na asewek so dilin Timplo.

Inkuanko, "Pakaskasi ak la! Anggapo lay ilalok! Maoges ya amin so sasalitaen na dilak, tan manaayam ak ed kawalaan da ray totoon maoges so sasalitaen da. Naamtaaan ko ya, lapud say Ari a Katawan Makapanyarin-amin so anengneng na saray dilin matak."

Insan sakey ed saramay sirapin so tinmikyab ed kawalaan ko. Walay sankaawit ton ngalab a sinipit ton inalad altar. Indelnet tod bibil ko may ngalab tan kuanto, "Nidelnet ya ed bibil mo, et natan naandi lay kaogsan mo tan apirdona la ray kasalanan mo."
Insan nadngel kon say Katawan kuanto, "Siopay ibakik? Siopay managbalita tayo?" Inmebat ak, "Siak, Ibaki mo ak!"

Salita na Katawan.

Ebat a Salmo

E. DIAD ARAP DA RAY ANGHIL, O KATAWAN, IKANTAK IRAY DAYEW ED SIKA.

1. Katawan, misasalamat ak ed sika ed intiron pusok; Kakantaan ta kay panangidayew diad arap da ray diriyos. Ondadakmomo ak ed arap na masanton Timplom tan idadayew koy ngaran mo, E.

2. Lapud ag mangoman a panangarom tan katooran mo, ta impanengneng mon sankatageyan so ngaran mo tan saray ganggan mo. Inebatan mo ak nen tinmawag ak ed sika; pinabiskeg mo ak na pakayarim. E.

3. Katawan, idayew kay amin ya ararid dalin, ta nadngel da ray sipan mo. Ikanta ray nipaakar ed ginagawam tan say nipaakar ed baleg la kagalangan mo. E.

4. Ilalaban mo ak diad panamegley na pakayarim. Sumpalen mon amin iray insipan mod siak; Katawan, andi-angaan so panangarom. Sumpal mo pay kimey ya inggapom. E.

KUMADWAN BABASAEN 1 Cor. 15:1-11

Babasaen ya inaon ed ononan sulat nen Pablo ed saray taga Corinto

Natan ipapanunot kod sikayo, agagi, so ibanghilyo ya impulong kod sikayo, say Maung a Balita ya inawat yo tan niletnegay pananisia yo. Nilaban kayo diad panamegley na Maung a balitan impulong ko no bembenan yon malet – likud labat no anggapoy kabaliksan na impanisia yo.

Ta inter kod sikayo so manonan bangat ya inawat ko met, salanti, inatey si Cristo lapud saray kasalanan tayo, onung ed Masanton Sulat; imponpon tan inmolin binmilay ed kumatlon agew, onung met ed masanton Sulat; pinmanengneng ed kinen Pedro, insan diad sikaran amin a labinduan apostol. Pinmanengneng met ed masoluk a liman lasus ya agagi a nantitipon. Karaklan ed sikaray mabilay ni ya anggad natan, balet inaatey la ray arum. Pinmanengneng met ed kinen Santiago, insan diad saray amin ya apostol.

Diad kasamputan, pinmanengneng met ed siak, anggaman a kaparak so ogaw a nianak ed oras ya ag ilaloan, ta sankaabebaan ak ed saray apostol, ag ak ingen manepeg a tawagey apostol, ta pinapairap koy iglisia na Dios. Balet lapud baleg a panangaroy Dios, nagmaliw ak ya apostol, tan ag naandiay kakanaan so baleg a panangaro ya inter tod siak. Mairap niy impankimey ko nen say siopaman ed sikara, anggaman ya aliwan lapud biskeg kon dili, no ag lapud baleg a panangaro na Dios ed siak. Kanyan siak man o sikara, sikato yay ipupulong mi tan sikato ya met so panisiaan yo.

Salita na Katawan.

Alleluia
E. Alleluia. No inaro ak na siopaman, onuren to ray salitak; aroen na Amak tan onla kamin manayam ed sikato. E. Alleluia.

Ibanghilyo Luc. 5:1-11

+Babasaen ya inaon ed masanton ibanghilyo onung ed kinen Lucas

Aminsan ya agew, manalalagey si Jesus ed gilig na Dayat na Genesaret. Manleletletan ya onsingger ed sikato ray toton ondengel ed salitay Dios. Anengneng nen Jesus so duaran baloto a tinaynan ed gilig na dayat na saray sumisigay, ta oorasan da ray iket da. Linmogan ed sakey ed saray baloto tan kinerew tod kinen Simeon ya akankien ed saya ya itolak toy daiset ed danum. Inmirung ed samay baloto, insan nampulong ed saray totoo.

Kasumpal ton nansalita, inkuantod kinen Simon, "Laka yo ed bandad aralem tan ipelag yo ray iket yo, pian makala kayoy sira."

"Maistro," ebat nen Simon, "sanlabi kami lan nansagput, et anggapoy nala mi. Balet lapud ibabagam, ipelag ko ray iket." Onyay ginawa ran tua, tan lapud karakel na nala ran sira, ngalngali la napilat ira may iket. Kinaweyan dan ondago tan ontulong iray kakaiba rad samay sakey a baloto. Dinmago ra tan diad inkapanoy duaran baloto na siran inkarga ra, ngalngali ra onlereg. Nen naimatunan nen Simon Pedro yan agawa, dinmakmomo ed saliyan nen Jesus tan inkuanto, "Arawi kad siak, Katawan, ta makasalanan ak a too!"

Nikelawan si Simon tan saray amin a wadman, lapud karakel na siran nala ra. Ontan met a nikelawan ira may kakaiba to, a di Santiago tan Juan ya anak nen Zebedeo. Inkuanen Jesus ed kinen Simon, "Ag ka natatakot. Manlapud natan, magmaliw kan sumisigay na too."

Insarsar da ra may baloto ra, tinaynan day amin a kayaryan da, tan akila rad kinen Jesus.

Ibanghilyo na Katawan.