31st Sunday in Ordinary Time (C)

ONONAN BABASAEN Kab. nen S. 11:22-12:1

Babasaen ya inaon ed libro na Kakabatan nen Solomon

Katawan, diad pakanengneng mo sakey a botil na buer so intiron mundo, a ngalngali ag to napagalaw so simbangan, sakey a terter na linaew ed dalin no kabwasan.  Diad pakapanyarim, nayarian mon gawaey antokaman, balet mapangasi ka ed balang sakey a too; papalabasen mo ray kasalanan mi tan iitdan mo kami na panaon a magbabawi.  Inarom so amin a bengatlan mambibilay; ag mo babalawen so antokaman a ginawam.  No ag mo labay, ag mo la komun ginawa.  Panoy pakapansiansia na sakey a bengatla no ag mo labay?  Panoy pakapambayag to, no ag mo pinalsa?  Inyabuloy mon mambilay, Katawan, lapud kayaryan mo, tan inarom so balang bengatlan mabilay.  Walad balang sakey ed sikara so ag ompatey ya ispiritum.

Salita na Katawan.

Ebat a Salmo

E. Anggad angga ya idayew koy ngaran mo, arik tan Dios ko.

1. Ibawag koy inkatalonggaring mo, Dios ko tan arik; ando lan ando a misalamat ak ed sika.  Agew-agew a misalamat ak ed sika; anggad angga ya idayew ta ka. E.

2. Say Katawan maaro tan mapangasi, aliwan maipapasnuk tan baleg so ag mangoman a panangaro to.  Sikatoy maung ed amin a too tan mapangasi ed amin a pinalsa to. E.

3. Katawan, idayew ka na amin a pinalsam, tan pisalamatan ka na amin a totoom.  Salitaen day kagalangay panarian mo tan ibaga ray pakayarim.  E.

4. Say Katawan matoor ed saray sipan to, tan maung ya amin iray gagawaen to.  Tutulongan to ray nagugunigon; itatanduro to ray atumba.  E.

KUMADWAN BABASAEN       2 Tes. 1:11-2:2

Babasaen ya inaon ed kumadwan sulat nen Pablo ed saray taga Tesalonica

Kekerewen mid Dios tayo a gawaen to kayon manepenepeg ed bilay ya anawagan tod sikayo.  Iyabuloy to komun, diad panamegley na pakayari to, a nagamuran yoy amin a maung a pilalek yo tan nasumpal yoy amin a kimey a bungay pananisia yo.  Diad ontan, napagalangan yoy ngaran na Katawan tayon Jesus, tan napagalangan to ki met onung ed baleg a panangaroy Dios tayo tan say Katawan a Jesu-Cristo.

            Nipaakar met ed isabiy Katawan tayon Jesu-Cristo tan say pitipon tayod sikato: kekerewen mid sikayo, agagi, ya ag komun nagogotgot a tampul so kanunotan yo tan ag kayo mapagpaga ed balitan sinmabi lay Agew na Katawan.  Angangko imparles, o impulong itan na sakey a too.  Nayari met angangkon ibabaga ran insulat mi.

Salita na Katawan.

Alleluia

E. Alleluia. Siak so dalan, say katwaan, tan say bilay, kuay Katawan; anggapoy toon makaonlad Ama no ag diad panamegley ko.  E. Alleluia.

Ibanghilyo                                Luc. 19:1-10

Babasaen ya inaon ed masanton ibanghilyo onung ed kinen Lucas

Tinmuloy si Jesus ed Jerico tan dinmalan ed baley.  Walad may sakey a mayaman a pangulo da ray sumisingil na buis; say ngaran to Zaqueo.  Labay ton naamtaan no siopay Jesus, balet lapud melmelag a too ag to nanengneng, ta amayamay so totoo.  Kanyan binmatik tan inonaan to ray totoo, insan kinmalab ed sakey a kiew a sikomoro pian nanengneng toy Jesus no ondalan diman.  Nen asabi nen Jesus iman a pasen, tinmangay tan inkuantod kinen Zaqueo, "Epas kan tampol, Zaqueo, ta nakaukolan ya ontuloy ak natan ed abung mo."

            Inmepas a tampol tan malikeliket ya anangkailid kinen Jesus.  Amin ya akaimatun ed saya ngoro-ngoro ra tan inkuanda, "Pasasangkaili ed sakey a toon makasalanan!"

            Inmalagey si Zaqueo tan inkuantod Katawan, "Iter koy kapalduay kayaryan ko ed saray mairap-bilay, Katawan; tan no wala bilang so sinaol ko, mamipat a karakel so ipawil ko."

            Inkuanen Jesus ed sikato, "Say kilalaban sinmabi natan ed sayan abung, ta anak met nen Abraham yan too.  Ta say Anak na Too linma dian mananap tan mangilaban ed abalang."

Ibanghilyo na Katawan.