32nd Sunday in Ordinary Time (C)

ONONAN BABASAEN        2 Mac. 7:1-2,9-14

Babasaen ya inaon ed kumadwan libro na Saray Macabeo

Diad sananey ya agawa, narel so sakey a Judion ina tan saray pitoran lalakin anak to.  Pababasigan ira na ari, pian napasoot iran mangan na karniy baboy.  Insan inkuan na sakey ed saray tobun-balo, "Antoy iilaloan mon nagamuran diad panggagawam na onya?  Labay miy niy ompatey nen say ikaindan mi ray abangonan mid saray lalaki mi."

            Balet diad kaonuran iran ingas na samay kumadwan agi ineyag tod ari, "Sikan managpatas na too! Nayarin pateyen mo kami, balet say Ari na sansinakuban et paolien to kamid bilay tan itdan to kami na bilay ya andi-anggaan, lapud tinoluk mi ray ganggan to."

            Ginapwan na saramay sondalo a nanliliketan so kumatlon agi.  nen ingganggan dad sikaton ondilat, ginawa ton tampol.  Insan mabiskeg so linawa ton angyonat na saray lima to tan kuanton mapuspuso, "Inter ira ya na Dios ed siak.  Balet mabli ni ray ganggan to nen sarayan limak, tan amtak ya ipawil ira lamet na Dios ed siak."  Mankelaw so ari tan saramay kakaiba to ed sebeg na linawa na samay kumatlon agi tan diad bulos na linawa ton manirap.

            Kayari na impatey to, insoblay a pinairap na saramay sondalo so kumapat ya agi, a singa saramay duaran inmona.  Balet saya so kaonuran a balikas to: "Maliket ak ya ompatey ed lima yo, lapud ag panduaruwaan a paolien kami na Dios ed bilay.  Balet ag ka onolid bilay, Antioco!"

Salita na Katawan.

Ebat a Salmo

E. Katawan, no ompanengneng so kagalangan mo, napano so gayagak.

1. Katawan, dengel mo pay ikekerew koy katonungan; imanom pay ikekerew ko na tulong!  Dengel mo pay pikakasik, ta ag ak mantitila. E.

2. Nankukurang ak lawas ed dalan mo, tan ag kon balut sinisianan.  Mampipikasi ak ed sika, O Dios, ta eebatan mo ak; lingaw ka pa sirin tan dengel mo ray salitak. E.

3. Iyagel mo ak pan singa panangyagel mod saray matam; iyamut mo ak pad silong da ray payak mo.  Lapud matonung ak, nanengneng ta ka; no ombangon ak, say kiwawalam papanoen to ak na gayaga.  E.

KUMADWAN BABASAEN       2 Tes. 2:16-3:5

Babasaen ya inaon ed kumadwan sulat nen Pablo ed saray taga Tesalonica

Say Katawan tayon Jesu-Cristo tan say Dios ya Ama tayo ya angarod sikatayo tan angiter ed sikatayoy andi-anggaan a biskeg na linawa tan maung ya ilalo lapud panangasi to, et pabiskegen to komuy linawa yo tan pasekderen to kayon manggawa tan mansalita na amin a kamaungan.

            Kaonuran, agagi, ipikasi yo kami pa, pian masiglat ya onkayat so salitay Katawan, tan pagalangan da a singa ginawa yo.  Ipikasi yo pa met ya iyagel kamiy Dios ed saray totoon bagel tan maoges, ta aliwan amin et mananisia.

            Say Katawan et matoor.  Pabiskegen tan iyagel to kayod samay Maoges.  Say Katawan so mangiiter na panmamatalek mid sikayo; ag mi panduaruwaan a gagawaen yo, tan ituloy yon gawaen, iray ingganggan mid sikayo.

            Say Katawan iwanwan to kayo komun ed lalon pakapikabat yo ed panangaro na Dios tan say pananos ya iiter nen Cristo.

Salita na Katawan.

Alleluia

E. Alleluia. Manalwar tan mamparaan kayo, ta ag yo amta so isabi na Anak na Too.  E. Alleluia.

Ibanghilyo                              Luc. 20:27-38

Babasaen ya inaon ed masanton ibanghilyo onung ed kinen Lucas

Wala ray pigaran Saduseo a linmad kinen Jesus.  (Sikara yay mangibabagan ag onolid bilay iray inaatey.)  Tinepet da, "Maistro, insulat nen Moises ya ganggan para sikami: 'No inatey so sakey a lakin anggapoy ilalak, nakaukolan ya asawaen na agi to may abalo, pian mananak ira para samay inatey.'  Wala nen saman iray pitoran sanaagi.  Angasaway pangulowan, balet inatey ya anggapoy ilalak.  Say kumadwad pangulowan inasawa to may balo na kuya to, balet inatey met ya anggapoy ilalak.  Ontan met so agawad kumatlon agi, ya anggad kumapito.  Inaatey iran amin ya anggapoy ilalak.  Diad kaonuran, inatey met imay bii.  Natan, diad iyolid bilay na saray inaatey, siopay makanasawa ed samay bii, anta amin da ra may pitoran sanaagi et nambabalesan dan inasawa?"

            Inmebat si Jesus ed sikara, "Diad sayan bilay, mangasawa ray lalaki tan miasawa ray bibii.  Balet saray lalaki tan saray bibiin nibilang ed saray manepeg ya onolid bilay, tan makakar ed biek a bilay, ag la ra mangasawa o miasawa.  Ag la ra nayarin ompatey, ta singa ra saray anghil.  Anak iray Dios, ta inmoli rad bilay.  Anggan si Moises a dili papaneknekan ton naolid bilay iray inaatey.  Diad samay tongtong a nipaakar ed manliub ya abeban kiew, sinalita to a say Katawan et 'Dios nen Abraham, Dios nen Isaac, tan Dios nen Jacob.'  Say labay to yan ibaga sikatoy Dios na saray mabilay, aliwan Dios na saray inaatey, ta diad sikato mabilay ya amin iray katoowan."

Ibanghilyo na Katawan.