Solemnity of Christ the King (C)

ONONAN BABASAEN                2 Sam. 5:1-3

Babasaen ya inaon ed kumadwan libro na Samuel

Insan amin a tribu na Israel linma rad kinen David diad Hebron tan kuandad sikato, "Kadalaan tan kalamanan mo kami.  Nen saman, anggan nen ari mi ni si Saul, impangulom ed bakal iray totood Israel, tan insipan ed sika na Katawan ya iwanwan mo ray totoo to tan oleyan mo ra."  Kanyan amin a panguloy Israel linma rad kinen Ari David diad Hebron.  Diad arap na Katawan akisapanan ed sikara, nilanaan da et nagmaliw ya ari na Israel.

Salita na Katawan.

Ebat a Salmo

E. Makaliliket ak nen nadngel kon inkuanda: Onla itayod abung na Katawan.

1.  Makaliliket ak nen inkuandad siak, "Onla itayod abung na Katawan."  Et natan wadya kami la, manalalagey ed loob na saray puirta na Jerusalem! E.

2.  Naapiger so Jerusalem; maoksuy tan marakep la lamet.  Dimay lalaen da ray tribu, saray tribu na Israel. E.

3.  Misalamat irad Katawan, onung na ingganggan tod sikara.  Dimay kawalaan da ray trono, a nansisintinsiaan na saray ararid Israel.  E.

KUMADWAN BABASAEN            Col. 1:12-20

Babasaen ya inaon ed sulat nen Pablo ed saray taga Colosas

Misalamat kid Ama a nanggawad sikatayon manepeg a minabang ed niparaan a tawiren da ray totoo to diad panarian na liwawa.  Inlaban to itayon nanlapud kabilongetan tan inyalis to itayod panarian na inararo ton Anak.  Arondon itayo la tan apirdona la ray kasalanan tayo diad panamegley na Anak.

            Si Cristo et indengan na Dios ya ag nanengneng.  Sikatoy pangulowan ya Anak, manona nen say amin a pinalsa.  Ta diad panamegley to, apalsa ray amin a walad tawen tan dalin, nanengneng man o andi, pati saray maispiritun pakayari, kakatawan, manoley, tan saray walay betang.  Apalsa ray amin a bengatla diad panamegley to tan para sikato.  Sikatoy wala la kasakbayan ya apalsay amin a bengatla tan diad panamegley to, maokoksuy ya amin iray bengatla.  Si Cristo so olo na iglisia a laman to.  Sikatoy nanlapwan na amiamin tan pangulowan ya Anak ya inmona-onan inmolid bilay, pian sikato so magmaliw a manona ed amin a ganagana.  Ta nilabay na Dios a manayam so intiron inka-Dios ed Anak.  Nilabay met na Dios ya ompawil so sankamundoan ed sikato diad panamegley na Anak.  Diad panamegley na impatey ed krus na Anak na Dios, nanggaway kareenan tan pinapawil tod sikaton dili so amin a bengatlan wald tawen tan walad tapew na dalin.

Salita na Katawan.

Alleluia

E. Alleluia. Nabindisionan komun so manawir na panarian nen David ya ama tayo; nabindisionan komun so onsabid ngaray Katawan.  E. Alleluia.

Ibanghilyo                              Luc. 23:35-43

Babasaen ya inaon ed masanton ibanghilyo onung ed kinen Lucas

Manalalagey iray totood man tan bambantayan day Jesus; balet saramay opisyal na baley niludlurey da.  Inkuanda, "Inlaban to ray arum.  Ilaban to met komuy laman ton dili, no tuan sikatoy Cristo a piniliy Dios!"

            Niludlurey met na saray sondalo; inasinggeran da, initdan day alak tan inkuanda, "Ilaban moy sikan dili, no tuan sikay ari da ray Judio!"

            Onyay akasulat ed olowan to: "Sikato yay Ari da ray Judio."

            Pinapabaingan na sakey ed saramay mambitbitin a kriminal.  Inkuanto, "Aliwa tan sikay Cristo? Ilaban moy sikan dili tan pati sikami met!"

            Balet nampasnukan na samay kaiba to ya inkuanto, "Ag mo tatakotay Dios, anta namparay dusam ed sikato? Nepeg tan dua so nadusay onya lapud ginawa ta, balet sikato anggapoy kasalanan a ginawa to."  Insan inkuantod kinen Jesus, "Nunot mo ak, Jesus, no kasabim ed Panarian mo!"

            Inkuanen Jesus ed sikato, "Kuankod sika: diad sayan agew, kaiba mo ak ed Paraiso."

Ibanghilyo na Katawan.